क्यानबेरा, मङ्सिर ३ गते । अस्ट्रेलियामा बेरोजगारी दर पाँच वर्षयताकै उच्च बिन्दुमा पुगेको छ । बिहीबार सार्वजनिक सरकारी तथ्याङकअनुसार सन् २०२६ को अक्टोबरमा अस्ट्रेलियाको बेरोजगारी दर बढेर ४ दशमलव ९ प्रतिशत पुगेको र यो सन् २०२१ को अक्टोबरयताकै उच्च बेरोजगारी दर हो ।

अस्ट्रेलियाली तथ्याङक विभाग (एबीएस) का अनुसार सेप्टेम्बरमा ४ दशमलव ७ प्रतिशत रहेको बेरोजगारी दर अक्टोबरमा बढेर ४ दशमवल ९ प्रतिशत पुगेको छ । अर्थशास्त्रीहरूले बेरोजगारी दर ४ दशमलव ७ प्रतिशतमै स्थिर रहने अनुमान गरेका थिए । तर सार्वजनिक तथ्याङ्कले उनीहरूको अनुमानभन्दा फरक अवस्था देखाएको छ ।

तथ्याङ्क विभागका अनुसार सेप्टेम्बरदेखि अक्टोबरसम्मको अवधिमा रोजगारीमा रहेका अस्ट्रेलियाली नागरिकको सङ्ख्या ४३ हजार ५०० ले घटेको छ । यसै अवधिमा बेरोजगार व्यक्तिको सङ्ख्या भने १७ हजार ८०० ले बढेको छ ।

अस्ट्रेलियन एसोसिएटेड प्रेसका अनुसार अर्थशास्त्रीहरूले अक्टोबरमा अर्थतन्त्रमा २० हजार नयाँ रोजगारी थपिने अपेक्षा गरेका थिए । यसअघि सेप्टेम्बरमा रोजगारीमा रहेका व्यक्तिको सङ्ख्या ३९ हजार ३०० ले घटेको थियो ।

यसैबीच, अस्ट्रेलियाको केन्द्रीय बैंक (रिजर्भ बैंक अफ अस्ट्रेलिया) ले नोभेम्बरको सुरुतिर सार्वजनिक गरेको प्रक्षेपणमा बेरोजगारी दर क्रमशः बढ्ने अनुमान गरेको थियो । बैंकका अनुसार सन् २०२६ को जुनमा ४ दशमलव ४ प्रतिशत रहेको बेरोजगारी दर डिसेम्बरसम्म ४ दशमवल ७ प्रतिशत पुग्ने र सन् २०२८ को मध्यतिर पाँच प्रतिशतसम्म पुग्न सक्ने अनुमान गरिएको थियो ।

अस्ट्रेलियाली तथ्याङ्क विभागका श्रम तथ्याङ्क प्रमुख शन क्रिकले बिहीबार सार्वजनिक गरेको विवरणअनुसार १५ देखि २४ वर्ष उमेर समूहका युवामा पनि बेरोजगारी बढेको छ। उक्त उमेर समूहको बेरोजगारी दर सेप्टेम्बरको ११ दशमलव १ प्रतिशतबाट बढेर अक्टोबरमा ११ दशमवल ३ प्रतिशत पुगेको छ। यो पनि पाँच वर्षयताकै उच्च दर हो ।

त्यस्तै, अक्टोबरमा रोजगारीमा रहेको जनसङ्ख्याको अनुपात ० दशमवल ३ प्रतिशत विन्दुले घटेर ६३ दशमलव ३ प्रतिशतमा झरेको छ । यो सन् २०२१ को डिसेम्बरयताकै न्यून स्तर हो ।

श्रमशक्ति सहभागिता दर पनि ० दशमवल २ प्रतिशत विन्दुले घटेर ६६ दशलव ६ प्रतिशतमा पुगेको तथ्याङ्क विभागले जनाएको छ । यस दरले काम गर्ने उमेरका जनसङख्यामध्ये कति व्यक्ति रोजगारीमा छन् वा रोजगारी खोजिरहेका छन् भन्ने देखाउँछ ।

यसैगरी, अक्टोबरमा अस्ट्रेलियाली नागरिकले काम गरेको कुल समय अघिल्लो महिनाको तुलनामा ०।२ प्रतिशतले घटेको छ । लगातार दुई महिनासम्म रोजगारीमा रहेका व्यक्तिको सङख्या घट्नु, बेरोजगारी दर बढ्नु तथा श्रमशक्ति सहभागिता दरमा कमी आउनुले अस्ट्रेलियाको श्रम बजारमा आएको परिवर्तनलाई संकेत गरेको छ । विशेषगरी युवा उमेर समूहमा बेरोजगारी बढ्नु रोजगार बजारका लागि चुनौतीका रूपमा देखिएको छ ।