नेपालगञ्ज, वैशाख ५ गते । विदेशी टोली नाइजेरियन जोन क्लब प्रथम खजुरा गोल्डकपको फाइनलमा प्रवेश गरेको छ । आज सम्पन्न निकै प्रतिष्पर्धात्मक अन्तिम सेमिफाइनल खेलमा नवलपरासीको फोर ब्रदर्स एफसीलाई २–१ गोल अन्तरले स्तब्ध पार्दै नाइजेरियन क्लब ‘एम्टी एरिना’ प्रथम खजुरा गोल्डकप फुटबल प्रतियोगिताको फाइनलमा प्रवेश गरेको हो ।
नाइजेरियाकोतर्फबाट ३९औँ मिनेटमा ताजुदिन अकिनसोला र ७८औँ मिनेटमा ओेलाबी अफिजले गोल गरेका थिए । फोर ब्रदर्स एफसीबाट अभिषेक महतोले गोल गरेका थिए । यो खेलमा नाइजेरियन जोनका तीन जना र फोर ब्रदरका दुई जनाले पहेँलो कार्ड पाएका थिए । फाइनल प्रवेशसँगै नाइजेरियन टोलीले जेबिएम फुटबल एकेडेमी लखनउसँगको उपाधि भिडन्त पक्का गरेको हो । दुवै प्रतियोगिताका विदेशी टोली हुन् ।
आइतबार अब उपाधिका लागि प्रतिस्पर्धा हुनेछ । आइतबार ४:०० बजे फाइनल खेल हुने प्रतियोगिताका प्रचार संयोजक खगेन्द्र दाहालले जानकारी दिनुभयो । नाइजेरियन जोन क्लबले नकआउट चरणमा सशस्त्र प्रहरीको एपिएफ क्लबलाई ३–० गोल अन्तरले हराउँदै सेमिफाइनलमा पुगेको थियो भने आयोजक न्यू डाँफे स्पोट्र्स क्लब खजुरालाई १–० गोल अन्तरले हराउँदै जेविएमले सेमिफाइनलको यात्रा तय गरेको थियो । खजुरा–४ डिगाउँस्थित मिनी रङ्गशालामा प्रतियोगिता भइरहेको छ । न्यू डाँफे स्पोट्र्स क्लबको आयोजनामा सोमबारदेखि प्रतियोगिता सुरु भएको हो ।
प्रतियोगिता नकआउटका आधारमा खेलाइएको हो । प्रतियोगितामा आयोजक न्यू डाँफे स्पोट्र्स क्लबसहित जेविएम फुटबल एकेडेमी लखनउ, काँक्रेविहार क्लब सुर्खेत, फोर ब्रदर्श एफसी नवलपरासी, एपिएफ काठमाडौँ र नाइजेरियन जोन क्लब नाइजेरिया गरी आठ टोलीको सहभागिता छ । प्रतियोगिताका विजेता टिमले नगद रु सात लाखसहित ट्रफी, मेडल र प्रमाणपत्र तथा उपविजेता टिमले नगद रु चार लाखसहित ट्रफी, मेडल र प्रमाणपत्र प्राप्त गर्नेछन् ।
विजेता पुरस्कार खजुरावासी हाल अमेरिका निवासी लीलबहादुर थापाको सौजन्यमा प्रदान गरिनेछ । वैदेशिक रोजगारीका सिलसिलामा हाल अमेरिकामा रहेका स्थानीय लीलबहादुर थापाले व्यक्तिगत रूपमा उक्त रकम सहयोग गरेका हुन् । आयोजक न्यू डाँफे स्पोट्र्स क्लबका अध्यक्ष बालाराम खत्रीले सहयोग रकम प्राप्त भइसकेको बताउनुभयो । प्रतियोगिताका सञ्चालनका लागि खजुरा गाउँपालिका, लुम्बिनी प्रदेश खेलकुद परिषद्, एम्टी एरिनालगायतले आर्थिक सहयोग गरेको आयोजकले जनाएको छ ।
