कास्की, माघ १९ गते । साफ महिला च्याम्पियनसिप प्रतियोगिता अन्तर्गत आज घरेलु टिम नेपालले भुटानको सामना गर्दैछ । गण्डकी प्रदेशको पोखरास्थित पोखरा अन्तरराष्ट्रिय फुटबल रङ्गशालामा यी दुई टिमबीच आज सोमबार प्रतिस्पर्धा हुन लागेको हो ।
पोखरामा जारी १९ वर्षमुनिको साफ महिला च्याम्पियनसीप फुटबल प्रतियोगिता अन्तर्गत आज लिग चरणका दुई खेल हुँदैछन् । पहिलो खेल बङ्गलादेश र भारतकाबीच मध्यान्ह १२ बजे सञ्चालन हुनेछ भने घरेलु टोली नेपालले दिउँसो ३ बजे भूटानसँग प्रतिस्पर्धा गर्नेछ । नेपाल र भूटान दुबैले यसअघि आफ्नो पहिलो खेलमा हार व्यहोरेका टिम हुन्। नेपालले आफ्नो पहिलो खेलमा भारतसँग १–० गोलको हार व्यहोरेको थियो भने प्रतियोगिताको उद्घाटन खेलमा भुटान भने बङ्गलादेशसँग १२–० को फराकिलो अन्तरले पराजित भएको थियो ।
आजको खेलमा घरेलु टोली नेपाल जितको खोजीमा मैदानमा उत्रँदै छ भने भुटान पनि नेपाललाई हराएर भारतसँगको पराजयमा मलमपट्टी लगाउन चाहन्छ । आजको खेल दुवै टिमका जित्नुपर्ने आवश्यकता छ । त्यसैले प्रतियोगिताको दोस्रो खेलमा नेपाल र भूटान दुबै टोली दबाबमा हुनेछन् । फाइनल सम्भावना जीवित राख्नका लागि दुबै टोलीलाई आजको खेल महत्वपूर्ण रहनेछ । बङ्गलादेश र भारतले भने एक÷एक खेल जितेर समान तीन अङ्क जोडेका छन् ।
प्रतियोगितामा यसपटक चार टोलीले मात्र सहभागिता जनाएका छन् । दक्षिण एसियाली फुटबल महासङ्घ (साफ)को समन्वय तथा अखिल नेपाल फुटबल सङ्घ (एन्फा)को आयोजनामा भएको प्रतियोगिता ‘राउन्ड रोबिन लिग’ प्रणालीमा खेलाइएको छ । जहाँ प्रत्येक टोलीले अन्य टोलीसँग एक–एक खेल खेल्ने छन् ।
प्रतियोगिताको लिग चरणपछि शीर्ष दुई टोलीले माघ २४ मा हुने फाइनल खेलमा उपाधिका लागि प्रतिस्पर्धा गर्ने छन् ।
