रास्वपाका सभापति रवि लामिछाने ।
काठमाडौँ, चैत २३ गते । शुक्रबार राति घरबाटै गिरफ्तार गरिएका राष्ट्रिय स्वतन्त्र पार्टी (रास्वपा) का सभापति रवि लामिछानेलाई आज शनिबार बुटवल लगिंदैछ । बुटवलस्थित सुप्रिम सहकारीको रकम ठगी प्रकरणमा अदालतको आदेश अनुसार राष्ट्रिय स्वतन्त्र पार्टी (रास्वपा) का सभापति लामिछानेलाई प्रहरीले पक्राउ गरेको हो ।
उपत्यका अपराध अनुसन्धान कार्यालयको टोलीले हिजो राति पूर्वउपप्रधान तथा गृहमन्त्री लामिछानेलाई बुढानीलकण्ठस्थित हेपाली हाइटमा रहेको निवासबाट गिरफ्तार गरेको थियो ।
शुक्रबार उच्च अदालत तुलसीपुरको बुटवल इजलासका न्यायाधीशद्वय रमेश ढकाल र स्वीकृति पराजुलीले लामिछानेलाई सहकारीको रकम ठगेको कसुरमा पुर्पक्षका लागि थुनामा पठाउन आदेश गरेसँगै प्रहरीले उनलाई पक्राउ गरेको हो ।
उच्चको आदेशसँगै यसअघि लामिछानेलाई जिल्ला अदालत रुपन्देहीले १ करोड रुपैयाँ धरौटीमा छाड्ने आदेश पनि बदर भएको छ । बुटवलको सुप्रिम सहकारी प्रकरणमा रुपन्देही जिल्ला अदालतले १ करोड धरौटी रकम मागेको आदेशविरुद्ध पुनरावलोकनका लागि लामिछानेले उच्च अदालतमा निवेदन दिनुभएको थियो ।
उच्च अदालतले जिल्लाको आदेश बदर गर्दै रास्वपाका नेता लामिछानेलाई थुनामै राख्ने आदेश दिएको छ । चैत २४ गते आइतबार लामिछानेलाई अदालतमा उपस्थित गराइने बताइएको छ ।
