काठमाडौँ, चैत २१ गते । मधेस केन्द्रित सात दलले ’सङ्घीय लोकतन्त्रिक मोर्चा घोषणा’ गरेका छन् । दलहरूले आज बिहीबार सङ्घीय राजधानी काठमाडौँको थापागाउँस्थित काठमाडौँ ब्याङ्क्वेटमा कार्यक्रम गरी मोर्चाको घोषणा गरेका हुन् ।
मधेस केन्द्रित सात दलीय नयाँ मोर्चामा जनमत पार्टी, जसपा नेपाल, लोसपा नेपाल, नागरिक उन्मुक्ति पार्टी, राष्ट्रिय मुक्ति पार्टी, जनता प्रगतिशील पार्टी र तमलोपा छन् ।
मोर्चाले नेपालको संविधान अपूर्ण, अधुरो, विभेदकारी र त्रुटिपूर्ण रहेकोले सबै समुदायले स्वामित्व ग्रहण गर्न सक्ने गरी समय सापेक्ष रुपमा संशोधन एवं परिमार्जन गर्न भरमग्दूर प्रयत्न गर्ने, मुलुकमा विद्यमान रहेका अनियमितता, प्रशासनिक ढिलासुस्ती, भ्रष्टाचार, लुटतन्त्र, कमिशनतन्त्र र विचौलियातन्त्र जस्ता विकृति र विसङ्गतिलाई नियन्त्रण गरी जनतालाई सदाचार र सुशासनको प्रत्याभूति गराउनका लागि जनजागरण तथा दबावमूलक कार्यक्रम अगाडि बढाउने, लाल आयोगको प्रतिवेदन तत्काल सार्वजनिक गराउन दबाब दिनेलगायत उद्देश्य र प्रतिबद्धता जनाएको छ । मोर्चाको नेतृत्व आलोपालो गर्ने सहमति गरिएको छ ।
साथै तराई मधेस पूर्वाधार विकास कार्यक्रम लागू गरी विकास निर्माणका कार्यलाई तिव्रता दिने र हुलाकी सडकलगायत राष्ट्रिय गौरवका आयोजनाहरुलाई यथाशीघ्र सम्पन्न गर्ने गरी योजना निर्माण गरी कार्यान्वयन गराउने, समानुपातिक निर्वाचन प्रणाली, प्रतिनिधिसभा र राष्ट्रिय सभामा समान जनसंख्याका आधारमा प्रतिनिधित्वको व्यवस्था र स्थानीय तहलाई प्रादेशिक क्षेत्राधिकारभित्र रहने व्यवस्था गराउन मानवीय विकासको सूचकाङ्क र जनसंख्याको आधारमा विकास, निर्माण र सेवाका लागि बजेट वितरण गरिनुपर्ने लगायत २६ बुँदे मोर्चाका उद्देश्य तथा राजनीतिक प्रतिबद्धता रहेको छ ।
