काठमाडौँ, चैत २१ गते । कार्यवाहक प्रधानमन्त्री प्रकाशमान सिंहले वातावरण प्रदूषणको हालको अवस्थाबारे सहरी विकास मन्त्रालयमा आज छलफल गर्नुभएको छ । शहरी विकास मन्त्रालयमा आज विज्ञसँग छलफल गर्दै कार्यवाहक प्रधानमन्त्री सिंहले वायु प्रदूषणका कारण जनजीवन प्रभावित हुँदै गएकोमा चिन्ता व्यक्त गर्नुभएको हो ।
प्रदूषण बढिरहेका बेला यसलाई कसरी रोक्ने र असर कम गर्ने भन्ने विषयमा सरोकारवाला र विज्ञहरूसँग छलफल भएको हो । उहाँले अहिले प्रदूषण बढ्नुको मुख्य कारण डढेले रहेकोले छिटै सरकारले यस विषयमा निर्णय लिने बताउनुभयो ।
छलफलका क्रममा विज्ञहरूले प्रदूषण कम नहुँदासम्म हप्ताको दुई दिन सार्वजनिक बिदा दिन र जोर–बिजोर गरेर सवारी साधन चलाउन सरकारलाई सुझाव दिएका छन् । यस्तै विज्ञहरूले सडक र अन्य आयोजना निर्माण गर्दा पनि अनिवार्य रूपमा प्रदूषणसम्बन्धी शुल्क तिर्ने व्यवस्था गरिनुपर्ने समेतका सुझाव दिइरहँदा राष्ट्रिय यातायात व्यवसायी महासङ्घले भने सार्वजनिक सवारी साधनले नभएर करिब दुई लाख निजी मोटरसाइकलले बढी प्रदूषण गरेको हुँदा त्यसलाई कम गरेर सार्वजनिक सवारी साधनलाई प्राथामिकता दिनुपर्ने बताएका छन् ।
