काठमाडौँ, चैत २१ गते । कामु प्रधानमन्त्री प्रकाशमान सिंहले शिक्षा विधेयकको विषयमा छलफल गर्न शिक्षा, विज्ञान तथा प्रविधि मन्त्री, प्रतिनिधिसभाको शिक्षा समितिका सांसदहरूलाई बोलाउनुभएको छ । कामु प्रधानमन्त्रीको सचिवालयका अनुसार शिक्षा विधेयकमा छलफल गर्न शिक्षामन्त्री र संसदीय समितिलाई आज अपहन्न ४ बजे बोलाउनुभएको हो ।
विद्यालय शिक्षा विधेयक तत्काल जारी गर्नुपर्ने माग राख्दै हिजोबुधकारदेलि शिक्षक तथा कर्मचारीहरू सडक आन्दोलनमा उत्रिएका छन् । शिक्षकहरूले ऐन जारी नहुँदासम्म काठमाडौँका सडक नछाड्ने चेतावनी दिँदै आएका बेला शिक्षा मन्त्रालयले वार्तामा आउन आग्रह गरेको छ भने कार्यवाहक प्रधानमन्त्री सिंहले सरोकार राख्ने सरोकारवालाहरूसँग शिक्षकका मागका विषय र विद्येयकबारे छलफल गर्न लाग्नुभएको हो ।
नेपाल शिक्षक महासङ्घका अध्यक्ष लक्ष्मीकिशोर सुवेदीले आफूहरूलाई वार्ताभन्दा ऐन चाहिएको र वार्ताको कुनै औचित्य नभएको बताउँदै जति सक्दो छिटो ऐन दियो त्यति नै छिटो आन्दोलन सकिने बताउनुभयो । उहाँले विगतमा सरकारले वार्ता गरेर नै सम्झौता गरेको बताउँदै ती सम्झौता कार्यान्वयन गर्नका लागि आफूहरूले ऐन मागेको बताउनुभयो ।
कामु प्रधानमन्त्री सिंहले सम्बन्धित सरोकारवालासँग विधेयकको स्थितिबारे छलफल गरेपछि आन्दोलनरत शिक्षकसँग वार्ता गर्ने तयारी रहेको उहाँको सचिवालयको भनाइ छ । नयाँ शैक्षिकसत्र सुरु गर्नुपर्ने समयमा शिक्षकहरू आन्दोलनमा उत्रिएपछि सरकारले चासो दिएको हो ।
