काठमाडौँ, चैत २१ गते । मधेस केन्द्रित विभिन्न सात दलले आज सङ्घीय लोकतान्त्रिक मोर्चाको घोषणा गर्ने भएका छन् । सात दलको सहभागी रहने उक्त मोर्चा आज दिउँसो ३ बजे बानेश्वर बैंकेटमा घोषणा हुने बताइएको हो ।
आज औपचारिक रूपमा घोषणा हुन लागेको मोर्चामा सङ्घीय संसद भित्र र बाहिर रहेका सात दल छन् । मोर्चाको नाम सङ्घीय लोकतान्त्रिक मधेसी मोर्चा राखिएको बुझिएको छ ।
यसअघि आठ दलको मधेसी मोर्चा गठनको तयारी रहेको यस मोर्चामा अशोक राई नेतृत्वको जनता समाजवादी पार्टी सानमेल नहुने सात दलीय मोर्चा घोषणा हुने भएको छ । नयाँ बन्ने सात दलीय मोर्चामा उपेन्द्र यादव नेतृत्वको जनता समाजवादी पार्टी नेपाल, महन्थ ठाकुर नेतृत्वको लोकतान्त्रिक समाजवादी पार्टी नेपाल, डा. सीके राउत नेतृत्वको जनमत पार्टी, रेशमलाल चौधरी संरक्षक रहेको नागरिक उन्मुक्ति पार्टी, र वृशेषचन्द्र लाल नेतृत्वको तराई मधेस लोकतान्त्रिक पार्टी, राजेन्द्र महतो नेतृत्वको राष्ट्रिय मुक्ति पार्टी नेपाल, हृदयेश त्रिपाठी नेतृत्वको जनता प्रगतिशील पार्टी रहने मोर्चामा सहभागी हुनेछन् ।
मोर्चामा आलोपालो नेतृत्व गर्ने बताइएको छ । मोर्चा घोषणापछिको पहिलो चरणमा जसपा नेपालका अध्यक्ष उपेन्द्र यादवले नेतृत्व गर्ने सहमति भएको बताइएको छ ।
