काठमाडौँ, चैत २० गते । गत शुक्रबार राजावादीको हिंसात्मक प्रदर्शनका क्रममा ज्यान गुमाउनेका परिवारलाई सरकारले १०/१० लाख रुपैयाँ दिने निर्णय गरेको छ । सरकारले काठमाडौंको तीनकुनेमा राजावादीको प्रदर्शनका क्रममा ज्यान गुमाएका पत्रकार सुरेश रजक र यातायात मजदुर सविन महर्जनको परिवारलाई जनही १० लाख रुपैयाँ दिने निर्णय गरेको हो ।
राजावादीको हिंसात्मक प्रदर्शनमा प्रहरीको गोली लागेर एक प्रदर्शनकारी सविन महर्जनको मृत्यु भएको थियो भने प्रदर्शनका क्रममा समाचार सङ्कलनार्थ खटिएका एभिन्यूज टेलिभिजनका पत्रकार सुरेश रजकको सोही प्रदर्शनका क्रममा भएको आगलागीमा परेर मृत्यु भएको थियो ।
दुबै जनाका परिवारलाई राहतस्वरुप सरकारकोतर्फबाट १०/१० लाख रुपैयाँ दिने निर्णय भएको गृह मन्त्रालय स्रोतले जनाएको छ ।
