काठमाडौँ, चैत २० गते । सङ्घीय संसदअन्तर्गत विभिन्न दुईवटा समितिको बैठक आज बस्दैछ । आज राज्य व्यवस्था तथा सुशासन समिति र सार्वजनिक नीति तथा प्रत्यायोजित विधायन समितिको बैठक बस्न लागेको हो ।
जसअन्तर्गत राज्य व्यवस्था समितिको बैठक आज बुधबार बिहान ११ बजे सिंहदरबारमा बस्दै छ । बैठकमा सङ्घीय निजामती सेवाको गठन, सञ्चालन र सेवाका सर्त सम्बन्धमा व्यवस्था गर्न बनेको विधेयक, २०८० माथि छलफल गर्न गठित उपसमितिको प्रतिवेदन पेस गर्ने कार्यसूची रहेको छ ।
साथै, निर्माणमुखी सामग्रीको व्यवस्थापन तथा नियमन सम्बन्धमा व्यवस्था गर्न बनेको विधेयक, २०८० माथि सैद्धान्तिक छलफल गरिने कार्यसूची रहेको छ ।
यसैगरी, सार्वजनिक नीति तथा प्रत्यायोजित विधायन समितिको बैठक आज बिहान साढे ११ बजे सिंहदरबारमा बस्ने भएको छ । उक्त बैठकमा समितिको आगामी कार्यक्रमबारे छलफल हुने संसद सचिवालयले जनाएको छ ।
