काठमाडौँ, चैत ८ गते । नेपाली काङ्ग्रेसका नेता डा शेखर कोइरालाले पार्टीको १५औँ महाधिवेशन २०८२ मङ्सिर मसान्तभित्रै हुनुपर्ने बताउनुभएको छ । नेपाली काङ्ग्रेस मोरङ–काठमाडौँ सम्पर्क समितिले आज काठमाडौँमा आयोजना गरेको ‘देशको वर्तमान अवस्था, चुनौतीहरू र नेपाली काङ्ग्रेसको भूमिका’ का विषयक अन्तरक्रिया कार्यक्रममा नेता डा कोइरालाले महाधिवेशन २०८२ मङ्सिर मसान्तभित्र नभए पार्टी कमजोर हुँदै जाने बताउनुभयो । उहाँले महाधिवेशन समयमै गर्न सबैले आवाज उठाउनुपर्ने बताउनुभयो ।
“महाधिवेशन २०८२ मङ्सिरभित्र नभए काङ्ग्रेस कमजोर हुँदै जान्छ । त्यतातिर ध्यान दिनुपर्छ, यो एकदम संवेदनशील कुरा हो,” नेता डा कोइरालाले भन्नुभयो । उहाँले राजनीतिक दल र नेतृत्वप्रति जनताको वितृष्णा बढेको उल्लेख गर्दै जनताको निराशालाई हटाउन जरुरी भएको धारणा राख्नुभयो ।
नेता डा कोइरालाले काङ्ग्रेस जनताको पार्टी भएकाले काङ्ग्रेसप्रति नागरिकको विश्वास कायमै रहेको बताउनुभयो । जनतासँग गरेका वाचा पूरा गर्न अग्रसर हुनुपर्ने बताउँदै उहाँले नेतृत्व नसुध्रिए अप्ठ्यारो परिस्थिति सिर्जना हुने जिकिर गर्नुभयो । “नेपाली काङ्ग्रेस जनताको पार्टी हो । नेपाली काङ्ग्रेसलाई अहिले पनि जनता विश्वास गर्छ । तर, हामी सुध्रिनुप¥यो । जनतासँग गरेका वाचाहरूलाई पूरा गर्न अग्रसर हुनुप¥यो । त्यो गरेनौँ भने अप्ठ्यारो परिस्थिति सिर्जना हुन्छ,” नेता डा कोइरालाले भन्नुभयो । काङ्ग्रेसको ध्यान सत्ता र सरकार केन्द्रित भइरहेको उहाँको भनाइ थियो । 
