कैलाली, फागुन ९ गते । उपप्रधानमन्त्री एवं सहरी विकासमन्त्री प्रकाशमान सिंहले विद्यार्थीलाई सैद्धान्तिकसँगै सीप विकाससँग जोडेर शिक्षा दिनुपर्ने बताउनुभएको छ । टीकापुरस्थित वीरेन्द्र विद्या मन्दिर माध्यमिक विद्यालयको स्वर्ण महोत्सवको अवसरमा आज यहाँ आयोजित कार्यक्रमको उद्घाटन गर्दै उहाँले टीकापुरलाई शैक्षिक नगरका रूपमा विकास गर्नुपर्ने धारणा राख्नुभयो । उहाँले शैक्षिकस्तर सुधार गर्न विद्यालयको विकासमा सबै केन्द्रित हुनुपर्नेमा जोड दिनुभयो ।
“टीकापुरलाई शैक्षिक नगरका रूपमा विकास गर्न सबैले सहकार्य गर्न जरुरी छ । विद्यार्थीलाई सैद्धान्तिक पढाइसँगै सीप विकाससँग जोडेर विद्यालयतहदेखि शिक्षा दिनु आजको आवश्यकता हो”, उपप्रधानमन्त्री सिंहले भन्नुभयो । उहाँले प्रविधि तथा सीप विकासमा लगानी गरी दक्ष र सीपयुक्त जनशक्ति उत्पादनमा विद्यालय केन्द्रित हुनुपर्नेमा जोड दिनुभयो ।
टीकापुर ‘स्मार्ट सिटी’का रूपमा विकास हुन सुरु भएको भन्दै उहाँले शिक्षाका माध्यमबाट यसलाई अझ सशक्त बनाउनुपर्ने उहाँले धारणा राख्नुभयो । “केही समय स्मार्ट सिटीका कार्यक्रमहरू अघि बढ्न सकेका छैनन्, आगामी दिनमा यसलाई निरन्तरता दिने प्रतिबद्धता गर्दछु”, उहाँले भन्नुभयो ।
सुदूरपश्चिम प्रदेशका मुख्यमन्त्री कमलबहादुर शाहले प्रदेश सरकारले टीकापुरमा विज्ञान तथा प्रविधि विश्वविद्यालय स्थापना गर्न लागेको जानकारी दिनुभयो । “हामीले विज्ञान तथा प्रविधि विश्वविद्यालय स्थापना गर्न खोजेका छौँ, अबको १० वर्षमा टीकापुर फेरिनेछ”, उहाँले भन्नुभयो ।
टीकापुर नगरपालिकाका प्रमुख रामलाल डगौरा थारुले वीरेन्द्र विद्या मन्दिर सार्वजनिक शैक्षिक गुठी भए पनि नगरले हरेक कार्यमा सघाउँदै आएको बताउनुभयो । कार्यक्रममा उच्च ओहोदामा पुगेका तथा विद्यालयमा उत्कृष्ट भएका पूर्वविद्यार्थीलाई स्म्मान गरिएको थियो ।
स्वर्ण महोत्सवमा सुदूरपश्चिम प्रदेशका मुख्यमन्त्री शाहसहित करिब दुई सयलाई सम्मान गरिएको थियो । आजै विद्यालयमका स्वर्ण स्तम्भ, ‘इ–पुस्तकालय’ उद्घाटन गरिएको छ । 
