काठमाडौँ, माघ २२ गते । संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले नेपालका विविध संस्कृति, प्रकृति र सम्पदा खुला सङ्ग्रहालय भएको बताउनुभएको छ । प्राडा सोमप्रसाद खतिवडाद्वारा लिखित हनुमानढोका दरबार क्षेत्रका मूर्त सांस्कृतिक सम्पदा नामक पुस्तक र हुनुमान ढोका स्मारिकाको आज विमोचन गर्दै उहाँले त्यस्तो बताउनुभएको हो । मन्त्री पाण्डेले भन्नुभयो, “हामी जीवित सम्पदाले धनी छौँ । विविध संस्कृति, प्रकृति र सम्पदा खुला सङ्ग्राहलयका रूपमा रहेका छन् । यसलाई चलायमान् बनाउन आवश्यक छ ।”
उहाँले ठूलो पूँजीका रूपमा रहेका जल, जङ्गल र जडिबुटीजस्ता जैविक सम्पदाको संरक्षणमा सबै जुट्नुपर्ने आवश्यकता आँैल्यानुभयो । प्राकृतिक सम्पदा जोगाउनका लागि प्राज्ञिक र एकेडेमिक रूपमा बहस र छलफल हुनुपर्नेमा मन्त्री पाण्डेको जोड थियो । “सम्पदाको अध्ययन, अन्वेषण हुँदा तथ्य र तथ्याङ्कमा आधारित भई वैज्ञानिक रूपमा पुष्टि हुनेगरी निष्कर्षमा पुग्नुपर्छ । हनुमानढोका दरबार क्षेत्रको मूर्त सांस्कृतिक सम्पदा नामक अनुसन्धात्मक पुस्तकले त्यसमा राम्रो सुरुआत गरेको छ”, उहाँले भन्नुभयो ।
