बैतडी, माघ १६ गते । सहिद दिवसका अवसरमा राष्ट्रिय समाचार समिति (रासस) का कार्यकारी अध्यक्ष धर्मेन्द्र झा सम्मानित हुनुभएको छ । सहिद दशरथचन्दको जन्मघर दशरथचन्द नगरपालिका–५ बस्कोटमा आयोजना गरिएको दशरथचन्द साहित्य उत्सव तथा अन्तर्राष्ट्रिय काव्य गोष्ठीको अवसरमा उहाँ सम्मानित हुनुभएको हो ।
राष्ट्रियता संरक्षण अभियानको आयोजना, दशरथचन्द नगरपालिकाको प्रवर्द्धन तथा सहिद दशरथचन्द स्मृति प्रतिष्ठानको सहकार्यमा सञ्चालित गोष्ठीमा अध्यक्ष झालाई ‘रामबहादुर चन्द स्मृति पत्रकारिता गौरव’ सम्मान प्रदान गरिएको अभियानका अध्यक्ष हेमबाबु लेखकले बताउनुभयो ।
विगत लामो समयदेखि नेपाली पत्रकारिताको विकासमा अध्यक्ष झाले पुर्याउनुभएको योगदान अविस्मरणीय र अनुवरणीय रहेको उल्लेख गर्दै सम्मान गरिएको आयोजकले जनाएको छ । चार दशक लामो पत्रकारिता यात्रामा प्रेस स्वतन्त्रता र नागरिकको हकहितमा उहाँले गर्दै आउनुभएको पैरवी र उदाहरणीय रहेको छ ।
“सक्रिय पत्रकारितासँगै नेपाली साहित्यको श्रीवृद्धिमासमेत योगदान प्रशंसनीय छ । नेपाली पत्रकारिता र मिथिला क्षेत्रको प्राचीन इतिहास, पुरातत्त्व, संस्कृति, कला र साहित्यको उन्नयनमा पुर्याउँदै आउनुभएको योगदानको उच्च कदर गर्दै दीर्घजीवन र उज्ज्वल भविष्यको कामनासहित सम्मान गरिएको हो,” आयोजक अभियानले भनेको छ ।
कार्यकारी अध्यक्ष झालाई नेपाल ललितकता प्रज्ञा प्रतिष्ठानका कुलपति नारदमणी हार्तम्छालीले सम्मानपत्र र रूद्राक्षको मालाले सम्मान गर्नुभयो । बैतडीको च्वागढ घर भएका रामबहादुर चन्द सुदूरपश्चिमकै पहिलो पत्रकार हुनुहुन्थ्यो । उहाँकै नाममा उक्त सम्मान स्थापना गरिएको हो ।
सो अवसरमा राससका सुदूरपश्चिम प्रादेशिक कार्यालयका प्रमुख सिद्धराज भट्टलाई पनि सम्मान गरिएको छ । प्रमुख भट्टलाई ‘दशरथचन्द स्मृति पत्रकारिता गौरव’ बाट सम्मान गरिएको हो । प्रेस स्वतन्त्रताका लागि निरन्तर क्रियाशील रहँदै सुदूरपश्चिमको पत्रकारिताको विकासमा पुर्याएको योगदानको कदर गरेर उहाँलाई सम्मान गरिएको सहिद दशरथचन्द स्मृति प्रतिष्ठानका अध्यक्ष विनोदबहादुर चन्दले बताउनुभयो ।
यस्तै सोही कार्यक्रममा ‘उद्योगपति गौरव’ बाट दानबहादुर चन्द, ‘समावेसी गौरव’ बाट मायाप्रकाश भट्ट, ‘शिक्षा क्षेत्र गौरव’ बाट मानबहादुर चन्द र ‘संस्कृति गौरव’ बाट ज्योतिष तारादत्त पन्त सम्मानित हुनुभएको छ ।
यसैबीच सम्मानपश्चात राससका कार्यकारी अध्यक्ष झाले सहिद दशरथचन्दको जन्मघरलाई सङ्ग्रहालयका रूपमा स्थापना गर्नुपर्ने बताउनुभयो । उहाँले भन्नुभयो, “यो जन्मघर मात्रै होइन, यो पालनधाम हो । कर्तव्यपथमा लैजाने ऊर्जाकर्म भूमि हो । यो घरलाई सङ्ग्रहालय बनाउनुपर्छ ।”
यसका साथै उहाँले साहित्य उत्सव र अन्तर्राष्ट्रिय काव्यगोष्ठीले संस्कृति जोड्ने, देश जोड्ने काम गरेको बताउनुभयो । कार्यकारी अध्यक्ष झा आजै सहिद दशरथचन्द स्मृति प्रतिष्ठानको आजीवन सदस्यसमेत हुनुभएको छ ।
