काठमाडौँ, मङ्सिर १३ गते । संस्कृति, पर्यटन तथा नागरिक उड्डयनमन्त्री बद्री पाण्डेले विश्वमा शान्ति फैलाउन बौद्धमार्गीको अतुलनीय योगदान रहेको बताउनुभएको छ । नेपाल पर्वतारोहण सङ्घले आज यहाँ आयोजना गरेको चौथो विश्व शान्ति पूजा कार्यक्रममा उहाँले बौद्धमार्गीका कारण विश्वमा शान्ति फैलाउन योगदान पुगेको बताउनुभएको हो ।
पर्यटनमन्त्री पाण्डेले ज्ञानबाट धनतिर जान लागेको समाजलाई बुद्धमार्गकै माध्यमबाट शान्ति फैलाउन मद्दत पुग्ने विश्वास व्यक्त गर्नुभयो । नेपाल शान्तिको मुहान भएको र विश्वका हरेक मानव एकपटक नेपाल आउनुपर्ने बताउँदै उहाँले एकपटक आएकाले पटकपटक आउने वातावरण बनाउनु आवश्यक रहेकामा जोड दिनुभयो । विश्व एक परिवार भएकाले विश्वभर एकता र मेलमिलाप हुनुपर्ने उहाँको भनाइ थियोे ।
“बुद्धको सन्देश संसारभर फैलियो । यो विश्व शान्ति पूजाको आयोजना गर्दैगर्दा मानवको मानसिक शान्ति र जलवायु परिवर्तनको जोखिमबाट बचाउन पृथ्वीमा शान्ति खोजिरहेका छौँ”, पर्यटनमन्त्री पाण्डेले भन्नुभयो, “बुद्धको शिक्षा र मार्गदर्शनलाई आत्मसात् गर्दै विश्वशान्ति र भ्रातृत्व कायम गर्न सबै लाग्नुपर्ने आवश्यकता छ ।”
पूर्वपर्यटनराज्यमन्त्री याङ्किला शेर्पाले विश्वशान्तिको कामनासहित आपसी भाइचारा अभिवृद्धिमा टेवा पु¥याउने उद्देश्यले कार्यक्रम गरिएको बताउनुभयो ।
गुरु शरणनाथ, बज्राधार शाक्य गोङेमा ठिछेन रिन्पोछेको ८०औँ जन्मोत्सवका अवसरमा दीर्घायु प्रार्थना समारोह तथा चौथो विश्वशान्ति पूजा आयोजना गरिएको हो । विश्वशान्ति पूजामा विभिन्न मुलुकबाट प्रतिनिधिहरु सहभागी रहेको जनाइएको छ ।
