फाइल तस्वीरः वन तथा वातावरणमन्त्री ऐनबहादुर शाही ठकुरी ।
काठमाडौँ, भदौ २५ गते । वन तथा वातावरणमन्त्री ऐनबहादुर शाही ठकुरी ब्राजिल प्रस्थान गर्नुभएको छ । ब्राजिलको रियो दि जेनेरियो सहरमा हुने ‘वन प्लानेट नेटवर्क फोरम’को सम्मेलनमा भाग लिन नेपाली प्रतिनिधिमण्डलको नेतृत्व गर्दै वन मन्त्री ठकुरी आज राति त्यसतर्फ प्रस्थान गर्नुभएको हो ।
ब्राजिल सरकार तथा संयुक्त राष्ट्रसङ्घअन्तर्गत वातावरण संस्था ‘युएनइपी’को संयुक्त आयोजनामा यही भदौ २७ गतेदेखि दुई दिनसम्म हुने सम्मेलनलाई मन्त्री ठकुरीले भदौ २८ गते सम्बोधन गर्नुहुने तालिका रहेको मन्त्रालयले जनाएको छ ।
‘दिगो उत्पादन तथा प्रयोग र चलायमान अर्थतन्त्र अवधारणा’ विषयक ज्ञानलाई सम्बोधन गरी समझदारी तथा अन्तर्राष्ट्रिय सहकार्य बढाउने उद्देश्यका साथ हुन लागेको सम्मेलनको उद्देश्य न्यायोचित तथा दिगो भविष्य बनाउनका लागि जलवायु परिवर्तनजस्ता सङ्क्रमण अवस्थालाई गतिशील गर्न सरकार, निजी क्षेत्र, नागरिक समाज र सम्बन्धित सरोकारवालाबीच सहकार्य र समझदारीको विकास गर्ने रहेको छ । उक्त सम्मेलन समापन पछि मन्त्री ठकुरी भदौ ३० गते आइतबार स्वदेश फर्कनुहुने मन्त्रालयले जनाएको छ ।
