फाइल तस्वीर
काठमाडौँ, भदौ १८ गते । लोकतान्त्रिक समाजवादी पार्टी (लोसपा) ले केन्द्रीय कार्यकारिणी समितिको बैठक बोलाएको छ । पार्टीको आगामी महाधिवेशनको टुङ्गो लगाउन भोलि भदौ १९ बुधबारदेखि दुईदिनका लागि केन्द्रीय कार्यकारिणी समितिको बैठक बोलाएको हो ।


सो पार्टीको बैठक भोलिदेखि काठमाडौँमा बस्नेछ । लोसपाले आगामी २०८२ साल बैशाखमा पार्टीको महाधिवेशन गर्ने तयारी थालेको छ । भोलिदेखि दुई दिनसम्म चल्ले समितिको बैठकले महाधिवेशन गर्नेस्थान र मिति तोक्ने छ । महाधिवेशनको स्थान र मिति तोकिएपछि आवश्यक कार्यक्रमहरु निर्माण र सञ्चालन गर्ने सो पार्टीले जनाएको छ ।


वडा, गाउँ, क्षेत्र तथा केन्द्रसम्म सङ्गठन सुदृढीकरणसम्बधी कार्यक्रम निर्माण गरिने बैठकमा पार्टी सञ्चालनका लागि आर्थिक नियमावली संशोधन गरिने पार्टीका सचिव प्रतीक पाठकले जानकारी दिनुभयो ।

संविधान संशोधनका विषयमा पार्टीले तय गर्ने एजेण्डामा समेत छलफल गरी सुझाव सङ्कलन गरिने बैठकमा समान विचारधारा भएका राजनीतिक दल तथा समूहसँगको सहकार्य एवं एकता गर्ने विषयमा छलफल गरिने छ ।

बैठकमा नेताहरूले दिएका सुझावका आधारमा साझा दृष्टिकोण बनाएर आगामी केन्द्रीय कमिटी बैठकबाट पारित गरिने जनाइएको छ । आसन्न मङ्सिरमा हुने स्थानीय तह उपनिर्वाचनका लागि आवश्यक तयारी तथा उपनिर्वाचन हुने तहमा पार्टीको अवस्था र वस्तुस्थितिबारे सम्बन्धित नेताले केन्द्रलाई जानकारी गराउने बैठकमा राष्ट्रिय तथा अन्तर्राष्ट्रिय अवस्थाबारे समीक्षा गरिने जनाइएको छ ।