फाइल तस्वीरः सङ्घीय मामिला तथा सामान्य प्रशासन मन्त्रालय ।
काठमाडौँ, भदौ १३ गते । सङ्घीय मामिला तथा सामान्य प्रशासन मन्त्रालयले सबै जिल्लामा जनप्रतिनिधि रिक्त स्थानको विवरण माग गरेको छ । मन्त्रालयले जिल्ला समन्वय समितिहरुलाई पत्राचार गर्दै जनप्रतिनिधि रिक्त रहेका स्थानीय तहको विवरण उपलब्ध गराउन पत्राचार गरेको हो ।
मन्त्रालयले सबै समितिहरुलाई यही भदौ १६ गतेभित्र जनप्रतिनिधिहरु रिक्त रहेको स्थानीय तहको विवरण उपलब्ध गराउन निर्देशन दिएको छ । जिल्ला समन्वय समिति प्रमुख, उपप्रमुख, नगरपालिका प्रमुख, उपप्रमुख तथा वडाध्यक्ष एवं गाउँपालिका अध्यक्ष, उपाध्यक्ष तथा वडाध्यक्षको पदावधि समाप्त नहुँदै निजको पद कुनै कारणले रिक्त भएमा त्यस्तो पदमा बाँकी पदावधिका लागि उपनिर्वाचन गर्ने प्रयोजनका लागि निर्वाचन आयोगबाट सोको विवरण माग भएको भन्दै मन्त्रालयले यस्तो परिपत्र गरेको हो ।
स्थानीय तह निर्वाचन ऐन, २०७३ को दफा ३ (२) बमोजिम निर्वाचन आयोगले उपनिर्वाचनको तयारी गरिरहेको छ । आयोगले यही भदौ ५ गते मन्त्रालयलाई पत्र पठाउँदै उपनिर्वाचन गर्नुपर्ने स्थानीय तहको विवरण माग गरेको थियो । आयोगको पत्रपछि मन्त्रालयले सबै जिल्ला समन्वय समितिलाई परिपत्र गरेर रिक्त रहेका पद, विसं २०७९ मा निर्वाचित पदाधिकारीको नाम, रिक्त भएको मिति, रिक्त हुनाको कारणलगायत विवरण पठाउन भनेको छ ।
