फाइल तस्वीर
काठमाडौँ, साउन १४ गते । सङ्क्रमणकालीन न्यायसम्बन्धी गठित संयन्त्रको बैठक सिंहदरबारस्थित गृह मन्त्रालयमा सुरु भएको छ । सङ्क्रमणकालीन न्यायसम्बन्धी विधेयकको विषय टुङ्गो लगाउन संयन्त्रका सदस्यसहित सरोकारवाला निकायसहितको बैठक केहीबेर अघिमात्रै गृह मन्त्रालयमा सुरुभएको हो ।
उक्त बैठकमा नेपाली काङग्रेसका केन्द्रीय सदस्य समेत रहनुभएको गृहमन्त्री रमेश लेखक, नेपाल कम्युनिष्ट पार्टी (एमाले) संसदीय दलका मुख्य सचेतक महेश बर्तौला र नेपाल कम्युनिष्ट पार्टी (माओवादी केन्द्र)का उपमहासचिव जनार्दन शर्मा सङ्क्रमणकालीन न्यायसम्बन्धी गठित संयन्त्रमा हुनुहुन्छ ।
उक्त बैठकमा कानुन, न्याय तथा संसदीय मामिलामन्त्री अजय चौरसिया, संसद्को कानुन, न्याय तथा मानवअधिकार समितिका सभापति विमला सुवेदी र महान्याधिवक्ता रमेश बडाललगायतको सहभागिता रहेको छ ।
यसअघि पनि शुक्रबार पनि गृह मन्त्रालयमा बसेको संयन्त्रको बैठकमा सङ्क्रमणकालीन न्यायसम्बन्धी विधेयकमाथि सहमति जुटाउने विषयमा छलफल गरेको थियो । उक्त बैठकमा सङ्क्रमणकालीन न्यायसम्बन्धी विधेयकमाथि सैद्धान्तिक सहमति जुटाएको बताइएको छ । सो सम्बन्धमा कानुनमन्त्री, महान्याधिवक्ता र सरोकारवालासँग पनि छलफल गर्ने निर्णयपछि आजको बैठकमा सरोकारवाला निकायका पदाधीकारीहरूको सहभागिता रहेको हो ।
सङ्क्रमणकालीन न्यायसम्बन्धी विधेयकमा पीडितमैत्री, सर्वोच्चको फैसला र अन्तर्राष्ट्रिय कानुनलाई आधार बनाएर सहमति जुटाउने प्रयास भइरहेको छ । माओवादी १० वर्ष जनयुद्धकालमा राज्य पक्ष र विद्रोही पक्षबाट घटनाहरुलाई किनारा लगाउन सङ्क्रमणकालीन न्यायसम्बन्धी विधेयक जारी संसद्बाट पास गर्नेगरी गठित समितिले काम गरिहेको छ ।
