फाइल तस्वीर
जनकपुरधाम, साउन ३ गते । धनुषा तथा महोत्तरीमा रासायनिक मल अभाव नरहेको कृषि सामग्री कम्पनी लिमिटेडले जनाएको छ । उक्त कार्यालयका प्रमुख बेचनकुमार साहका अनुसार मलको पर्याप्त मौज्दात रहेको तथा सहकारी संस्थामार्फत ढुवानी तथा बिक्रीवितरण भइरहेको छ ।
दुवै जिल्लामा सम्बन्धित नगरपालिका तथा गाउँपालिकाले निर्धारण गरेको ‘कोटा’अन्तर्गत सहकारी संस्थामार्फत मल बिक्रीवितरण हुने प्रावधान छ । सोहीअनुसार मल वितरण गरेको उहाँले जानकारी दिनुभयो । हाल युरिया नौ सय मेट्रिक टन, डिएपी मल ८४ मेट्रिक टन तथा पोटास ५८ मेट्रिक टन मौज्दात छ ।
कृषि सामग्री कम्पनीबाट धनुषा र महोत्तरीका २७ पालिका अन्र्तगत दुईसय नौवटा सहकारी संस्थामार्फत मल बिक्री भइरहेको छ । भारतसँग सीमा जोडिएका पालिकाका किसानले भने भारतीय बजारबाट मल खरिद गर्ने गरेको किसानले जनाएका छन् ।
आर्थिक वर्ष २०८०/८१ मा ३५ करोड ४० लाख ८३ हजार रुपैयाँको १२ हजार चार सय मेट्रिक टन मल बिक्री गरेको जनाएको छ । उक्त आवमा ११ करोड ५५ लाख ४१ हजार रुपैयाँको ९२ दशमलव ५५ मेट्रिक टन युरिया, २३ करोड ७८ लाख रुपैयाँको एक सय ५० मेट्रिक टन डिएपी तथा ७० लाख ८४ हजार रुपैयाँको पाँच हजार ९६ मेट्रिक टन पोटास र छ लाख ७२ हजार रुपैयाँ मूल्य बराबरको ८४ मेट्रिक टन चुन बिक्री भएको छ ।
धनुषामा ४२ हजार हेक्टरमा धानखेती हुँदै आएको तथा हालसम्म ७० प्रतिशत रोपाइँ भएको जिल्ला कृषि ज्ञान केन्द्रले जनाएको छ ।
