फाइल तस्वीर
तनहुँ, असार ६ गते । शुक्लागण्डकी नगरपालिकादेखि व्यास नगरपालिकासम्म जोडिने शहीद लालध्वजमार्ग स्तरोन्नतिको काम सुरु भएको छ ।
शुक्लागण्डकी नगरपालिका–१ थप्रेकदेखि व्यास नगरपालिका–६ सिन्धुसम्म जोडिने उक्त मार्ग स्तरोन्नतिका लागि जिल्ला पूर्वाधार विकास कार्यालय बोलपत्र आह्वान गरेको छ । पूर्वाधार विकास कार्यालय १५ करोड रुपैयाँको लागतमा उक्त मोटरमार्गको स्तरोन्नतिका लागि बुधबार सूचना प्रकाशित गरेको हो ।
चालु आर्थिक वर्षमा गण्डकी प्रदेश सरकारबाट चार करोड रुपैयाँ बजेट विनियोजन गरी विस्तृत परियोजना प्रतिवेदन तयार गरिएको हो । सडकका लागि प्रदेश भौतिक पूर्वाधार तथा यातायात मन्त्रालय र आर्थिक मामिला मन्त्रालयले १५ करोड रुपैयाँको स्रोत सुनिश्चित गरेको छ । वि सं २०५२ पुस २८ गते यो सडकको ‘ट्रयाक’ खुलेको थियो ।
