फाइल तस्वीर
नवलपरासी — पश्चिम नवलपरासीको बर्दघाट नगरपालिका वडा नं ५ मा नमूना औद्योगिक ग्राम निमार्णको काम सुरु भएको छ । खजुरा खोला नजिक १७ बिघा १७ कठ्ठा क्षेत्रफलमा करिब १९ करोड रुपैयाँको लागतमा नमूना औद्योगिक ग्राम निर्माण सुरु भएको हो ।
औद्योगिक ग्रामको एक समारोहबीच आज उद्योग वाणिज्य तथा आपूर्तिमन्त्री रमेश रिजाल र उद्योगपति एवं सङ्घीय सांसद विनोद चौधरीले संयुक्तरूपमा शिलान्यास गर्नुभयो । सो अवसरमा मन्त्री रिजालले सरकार निजी क्षेत्रसँग सहकार्य गरी अघि बढ्न तयार रहेको बताउनुभयो ।
उहाँले समयसापेक्ष सरकारले औद्योगिक नीतिनियम प्रभावकारी बनाउँदै लैजाने जिकिर गर्नुभयो ।सांसद चौधरीले एसएमई भिलेज उद्यमशीलताको नमूना बन्ने र नवलपरासीका युवालाई उद्यमी बनाउन यस परियोजनाको ठूलो महत्व रहने बताउनुभयो ।
नेपाल सरकारको २०७७/७८ को नीति तथा कार्यक्रमअनुसार देशका कुल एक सय ३० पालिकामा नमूना औद्योगिक ग्राम निर्माण गर्ने योजनाअन्तर्गत पश्चिम नवलपरासीको बर्दघाटमा जिल्लाकै पहिलो नमूना औद्योगिक ग्राम निर्माण थालिएको छ ।
उद्योग वाणिज्य तथा आपूर्ति मन्त्रालयले चालु आर्थिक वर्षमा उक्त ग्राम निर्माणको काम अघि बढाउन तत्कालका लागि कुल रु चार करोड विनियोजन गरेको थियो । मन्त्रालयले प्रारम्भिक चरणको काम अघि बढाउन आह्वान गरेको बोलपत्रअनुसार सो कार्य गर्न दुई करोड ९३ लाख रुपैयाँमा रिलायन्स बिल्डर्स एण्ड सप्लायर्स जेभीले जिम्मा पाएको छ ।
प्रथम चरणको कार्य आगामी महिनाभित्र सम्पन्न गर्ने लक्ष्य रहेको रिलायन्स बिल्डर्स एण्ड सप्लायर्स जेभीमा कार्यरत प्राविधक रवीन्द्र शाहले जानकारी दिनुभयो । उद्योग वाणिज्य तथा आपूर्ति मन्त्रालयअन्तर्गतको विशेष आर्थिक क्षेत्र प्राधिकरणले उक्त नमूना औद्योगिक ग्राम निर्माणको आवश्यक सहजीकरण गर्दै आएको छ ।
उद्योग ग्रामभित्र स्थापना हुने साना तथा मझौला उद्योगका लागि उद्योग परिसरमा आवश्यकतानुसार भौतिक पूर्वाधार, उत्पादन र प्रदर्शनीस्थल, फोहर प्रशोधन केन्द्र, सञ्चार, सडक, बिजुली, नाला तथा आवश्यक औद्योगिक विभिन्न संरचना निर्माण हुनेछन् ।
उद्योगग्राममा कुल ९० ‘प्लट’मा साना घरेलु तथा मझौला उद्योग सञ्चालन हुनेगरी उद्योगका लागि आवश्यक सबै संरचना निर्माण गर्ने आगामी योजना छ । उक्त नमूना औद्योगिक ग्राम क्रमागतरूपमा निर्माण हुँदै जानेछ । मन्त्रालयले नमूना औद्योगिक ग्रामका रूपमा निर्माण गर्ने भए पनि यस ग्रामको सञ्चालन तथा व्यवस्थापन बर्दघाट नगरपालिकाले गर्ने छ ।
