फाइल तस्वीर: नेपाली काङ्ग्रेसका महामन्त्री गगनकुमार थापा ।
काठमाडौँ — नेपाली काङ्ग्रेसका महामन्त्री एवम् प्रतिनिधिसभा सदस्य गगनकुमार थापाले स्वास्थ्य बीमालाई प्रभावकारी बनाउनु पर्नेमा जोड दिनुभएको छ । नेपाल चिकित्सक सङ्घद्वारा आज यहाँ आयोजित ‘स्वास्थ्य सेवा प्रणालीको उन्नयनका लागि स्वास्थ्य अर्थशास्त्र’ विषयक अन्तरक्रिया कार्यक्रममा बोल्दै सांसद थापा यस्तो धारणा व्यक्त गर्नुभएको हो ।
सरकारले ल्याएको स्वास्थ्य बीमा कार्यक्रम असफल हुन लागेको प्रति चिन्ता व्यक्त गर्दै काङ्ग्रेस महामन्त्री थापाले स्वास्थ्य बीमा कार्यक्रमलाई प्रभावकारी बनाउन आवश्यक रहेको बताउनुभयो । संविधानमा लेखेअनुसारको स्वास्थ्यसम्बन्धी हक कार्यान्वयन गराउनका लागि स्वास्थ्य बीमा कार्यक्रम ल्याइए पनि सफल हुन नसकेको भन्नुहुँदै सांसद् थापाले प्रधानमन्त्री तथा उच्च तहमा स्वास्थ्य बीमाबारे छलफल नहुँदा अलपत्र परेको भन्दै दुखेसो व्यक्त गर्नुभयो ।
सांसद् थापाले आफु स्वास्थ्यमन्त्री हुँदा हरेक नागरिकलाई स्वास्थ्यको पहुँचमा पु¥याउन स्वास्थ्य बीमा कार्यक्रम ल्याएको उल्लेख गर्नुहुँदै “स्वास्थ्य बीमा राजनीतिक कुरा हो । राजनीतिक दलको नेताले मेरो नागरिकलाई संविधानमा लेखेअनुसार स्वास्थ्य सेवा पु¥याउँछु भन्नुपर्दछ” भन्नुभयो । प्रधानमन्त्री तथा राजनीतिक दलका नेताहरुबीच स्वास्थ्य बीमाका बारेमा छलफल नभएको हुँदा स्वास्थ्य बीमा अलपत्र परेको र स्वास्थ्य बीमासम्बन्धी कानुनलाई आवश्यक संशोधन गर्दै लगेर प्रभावकारी कार्यान्वयन गर्नुपर्नेमा जोड दिनुभयो । सांसद् प्रकाश पन्थले स्वास्थ्य बीमा कार्यान्वयन गर्नसके संविधानअनुसार नागरिकलाई स्वास्थ्य सेवा उपलब्ध गराउन सकिने धारणा राख्नुभयो । उहाँले स्वास्थ्य सेवा र प्रणालीमा सुधारको खाँचो रहेको उल्लेख गर्दै सामाजिक सुरक्षाका नाममा पैसा गइरहेकाले एकद्वारमार्फत स्वास्थ्यमा खर्च गर्नुपर्ने बताउनुभयो ।
कार्यक्रममा अर्थ मन्त्रालयका सहसचिव उत्तरकुमार खत्रीले स्वास्थ्य मन्त्रालयलाई प्राथमिकतामा राखेर नै बजेट बनाएको बताउनुभयो । उहाँले आधारभूत स्वास्थ्य सेवा निःशुल्क र बीमालाई व्यवस्थित गर्ने कुरामा गृहकार्य भइरहेको बताउनुभयो ।
स्वास्थ्य मन्त्रालयका नीति, योजना तथा अनुगमन महाशाखाका प्रमुख डा कृष्णप्रसाद पौडेलले संविधानले सुनिश्चित गरेअनुसार आधारभूत स्वास्थ्य सेवा निःशुल्क उपचार गराउन नसकेको बताउनुभयो । उहाँले जनशक्ति अभावले गुणस्तरीय स्वास्थ्य सेवा उपलब्ध गराउन नसकेको बताउनुभयो ।
“नागरिकलाई आधारभूत स्वास्थ्य सेवा व्यवस्थित गर्न उपलब्ध गराउन नसकेका कारणले र गुणस्तरीय स्वास्थ्य सेवा दिन सकेनौँ”, उहाँले भन्नुभयो, “स्वास्थ्य बीमा कार्यक्रम सफल हुन सकेन ।”
