प्रतिकात्मक तस्वीर
दाङ — दाङको देउखुरीमा दुईवटा बस एक आपसमा ठोक्किँदा एक जनाको मृत्यु भएको छ भने २३ जना घाइते भएका छन् ।
आज शुक्रबार बिहान करिब ७ बजेको समयमा भएको उक्त दुर्घटनामा मृत्यु हुनेमा रोल्पा रुन्टीगढी–९ कि २४ वर्षीया शोभा परियार रहेकी छन् । दुर्घटनामा उनका दुई छोरासहित २३ जना घाइते भएका छन् । घाइतेमध्ये १२ जनाको अवस्था गम्भीर छ ।
जिल्ला प्रहरी कार्यालय दाङका अनुसार लमहीबाट भालुवाङतर्फ जाँदै गरेको लु २ ख ७८५ नम्बरको बस र वीरगन्जबाट दाङको तुलसीपुर आउँदै गरेको ना ५ ख ४८९८ नम्बरको बस लमही नगरपालिका–३ फल्कापुरमा ठोक्किएर दुर्घटना भएको हो ।
जिल्ला प्रहरी कार्यालय दाङका अनुसार घाइतेमध्ये १२ जनाको अवस्था गम्भीर रहेको छ । गम्भीर घाइतेहरूमध्ये ७ जनालाई भैरहवा, ३ जनालाई राप्ती स्वास्थ्य विज्ञान प्रतिष्ठान घोराही र २ जनालाई नेपालगञ्ज रिफर गरिएको छ भने अन्य घाइतेहरूको लमही अस्पतालमा उपचार भइरहेको बताइएको छ ।
