काठमाडौं — उपप्रधानमन्त्री तथा गृहमन्त्री नारायणकाजी श्रेष्ठ र नेपालका लागि अमेरिकी राजदूत डिन थम्पसनबीच शिष्टाचार भेट भएको छ । उहाँहरुबीच आज बिहान गृह मन्त्रालयमा भएकोे भेटमा राजदूत थम्पसनले शान्ति प्रक्रिया र नेपालको राजनीतिक स्थिरताबारे चासो राख्नुभएको बताइएको छ ।
उपप्रधानमन्त्री श्रेष्ठको सचिवालयका एक सदस्य कमल गिरीका अनुसार भेटमा राजदूत थम्पसनले अमेरिकाले नेपालको शान्तिप्रक्रियाले पूर्णता पाएको देख्न चाहेको तथा आफू र आफ्ना कूटनीटिक साझेदारहरूसँग यसको सहजताका लागि पहल लिन तयार रहेको बताउनुभएको थियो । राजनीतिक अस्थिरताले विकासमा पार्न सक्ने प्रभावका बारेमा पनि राजदूत थम्पसनले चासो लिनुभएको थियो ।
सो क्रममा उपप्रधानमन्त्री श्रेष्ठले सरकार सङ्क्रमणकालीन न्याय निरुपण सम्बन्धी विस्तृत शान्ति सम्झौताको मर्मअनुसार शान्तिप्रक्रियाका बाँकी काम सम्पन्न गर्ने उद्देश्यमा केन्द्रित भएको र नेपालका हितैषी अन्तर्राष्ट्रिय निकायबाट त्यसमा सहयोगको अपेक्षा गरिएको बताउनुभयो ।
