काठमाडौं – निर्वाचन आयोगले उपनिर्वाचनका आगामी वैशाख १० गते हुने प्रतिनिधिसभा उपनिर्वाचनका लागि उम्मेदवारी दिएकाहरूको अन्तिम नामावली आज प्रकाशन गर्दैछ । आयोगले उम्मेदवारकाविरुद्धमा परेका उजुरीमाथि छानबिन गरी आजै साँझ ६ बजेभित्र उम्मेदवारको अन्तिम नामावली प्रकाशन गर्न लागेको हो ।
तनहुँ–१, चितवन–२ र बारा–२ मा सोमबार मनोनयन दर्ता गराएका उम्मेदवारविरुद्ध आयोगले मङ्गलबार उजुरी दर्ताको समय तोकेको थियो । तीनवटै निर्वाचन क्षेत्रमा दल र स्वतन्त्र गरी ६९ जनाले उम्मेदवारी दर्ता गरे पनि मुख्यतः चितवन–२ का उम्मेदवार रवि लामिछानेविरुद्ध ४ वटा उजुरी परेको छ । सो अनुसार मुख्य निर्वाचन अधिकृतको कार्यालयले रविलाई आज दिउँसो १ बजेभित्र स्पष्टीकरण पेश गर्न भनेको छ ।
भोलि बिहीबार बिहान ९ बजेदेखि दिउँसो १ बजेसम्म उम्मेदवारको नाम फिर्ताका लागि आयोगले समय तोकेको छ । सोही दिन दिउँसो ३ बजे उम्मेदवारको अन्तिम नामावली प्रकाशन गर्ने कार्यतालिका छ । अन्तिम नामावली प्रकाशन भएपछि उम्मेदवारले चुनाव चिह्न पाउनेछन्।
गत मङ्सिर ४ गते सम्पन्न भएको निर्वाचनमा तनहुँ–१ बाट प्रतिनिधिसभा निर्वाचित काङ्ग्रेस वरिष्ठ नेता रामचन्द्र पौडेल राष्ट्रपति तथा बारा–१ बाट निर्वाचित जसपा नेता रामसहाय प्रसाद यादव उपराष्ट्रपति भएपछि र चितवन–२ बाट प्रतिनिधिसभा सदस्यमा विजयी भई गृहमन्त्रीसमेत बनिसक्नुभएका राष्ट्रिय स्वतन्त्र पार्टीका सभापति रवि लामिछाने नागरिकता प्रकरणका कारण सांसद पदबाट नै हटेपछि यी तीन क्षेत्र रिक्त भएको हो । अतः यी तीनै क्षेत्रमा आगामी बैशाख १० गते उपनिर्वाचन गरी पुनः प्रतिनिधिसभा सदस्य चयन गर्न लागिएको हो ।
