सत्ता गठबन्धन दलको फाइल तस्वीर,
काठमाडौं — प्रतिनिधिसभा सदस्यमा रिक्त स्थानका उपनिर्वाचनको विषयलाई लिएर दश दलीय सत्ता गठबन्धनमा धाँजा फाटेको छ । गठबन्धनमा रहेका सत्ता गठबन्धनको ठूला र साना दलहरुले उपनिर्वाचनमा आफ्ना उम्मेदवार उठाएपछि विभाजित भएका हुन् ।
सत्ता गठबन्धनका मुख्य ठूला दल नेपाली काङ्ग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी नेपाल र लोकतान्त्रिक समाजवादी पार्टी गरी पाँचले दल एक ठाउँमा छन् भने राष्ट्रिय स्वतन्त्र पार्टी, जनमत पार्टी, नागरिक उन्मुक्ति पार्टीलगायत चुनावी गठबन्धनबाट बाहिर छन् ।
रास्वपाले उपनिर्वाचन हुने तीन वटै क्षेत्रमा आफ्नो उम्मेदवार उठाएको छ भने गठबन्धनकै पाँच दलले यी तीनवटै निर्वाचन क्षेत्रमा साझा उम्मेदवार बनाएका छन् । अरु साना दलले बारा निर्वाचन क्षेत्र २ मा मात्रै उम्मेदवारी दिएका छन् ।
गठबन्धनका ठूला पाँच दलले आज मङ्गलबार बैठक बसेर बारा निर्वाचन क्षेत्र नम्बर– २ मा जनता समाजवादी पार्टी नेपालका अध्यक्ष रहेका उपेन्द्र यादव चितवन निर्वाचन क्षेत्र नम्बर २ मा नेपाली काङ्ग्रेसका जितनारायण श्रेष्ठ र तनहुँ निर्वाचन क्षेत्र नम्बर १ मा काङ्ग्रेसकै गोविन्द भट्टराईलाई समर्थन गर्ने निर्णय गरेका छन् ।
गठबन्धनमा रहेका जनमत पार्टी, नागरिक उन्मुक्ति पार्टी, राष्ट्रिय जनमोर्चा, बाबुराम भट्टराई नेतृत्वको नेपाल समाजवादी पार्टी र प्रभु साह नेतृत्वको आम जनता पार्टी चुनावी गठबन्धनबाट बाहिर छन् ।
आगामी वैशाख १० गते आईतबारका दिन चितवन–२, तनहुँ–१ र बारा निर्वाचन क्षेत्र २ बाट प्रतिनिधिसभामा प्रतिनिधित्व गर्ने सदस्य पद रिक्त भएका कारण उपनिर्वाचन हुँदैछ ।
