फाइल तस्वीर
जनकपुरधाम — नेपाल कम्युनिस्ट पार्टी (एमाले) मधेश सरकारबाट बाहिरिएको छ । मधेश सरकारमा रहेका नेकपा एमालेका मन्त्रीहरुले आज मन्त्रीपदबाट राजीनामा दिएर सरकारबाट बहिर्गमन भएका हुन् ।
एमालेका तर्फबाट मधेश सरकारमा एमालेबाट भौतिक पूर्वाधार विकासमन्त्रीमा सरोजकुमार यादव, महिला, बालबालिका, युवा तथा खेलकुदमन्त्री पदमा मोहमद जयद आलम, गृह तथा सञ्चारमन्त्रीमा शत्रुधन प्रसाद सिंह, कानून, न्याय तथा प्रदेशसभा मामिला मन्त्रीमा राजकुमार लेखी र गृह तथा सञ्चार राज्यमन्त्री पदमा केशव रायले मुख्यमन्त्री सरोजकुमार यादवसमक्ष राजीनामा पत्र बुझाएका हुन् ।
हिजो सोमबार मुख्यमन्त्री यादवले फोन गरेर सरकारमा सहभागी भएका एमालेका मन्त्रीहरुलाई राजीनामा बुझाउन आग्रह गरेका थिए । मुख्यमन्त्री यादवको आग्रह पछि एमालेका मन्त्रीहरुले आज राजीनामा बुझाएका हुन् ।
गत पुष २७ गते एमालेको समर्थनमा जनता समाजवादी पार्टी नेपालका मधेस प्रदेशका संसदीय दलका नेता सरोजकुमार यादव मुख्यमन्त्रीमा नियुक्त भएका थिए । केन्द्रीय समीकरण बदलिएसँगै मधेश प्रदेशमा पनि सत्ता समीकरण फेरबदल भएको छ ।
