फाइल तस्वीर
म्याग्दी — म्याग्दीको बेनी नगरपालिकाले नगरपालिकाभित्रका पुराना सम्पदाको संरक्षणका लागि मौलिकस्वरुप नविग्रने गरी पुनःनिर्माण तथा उत्खननको काम सुरु गरेको छ । बेनी नगरपालिकाले वडा नम्बर ७ भित्र रहेका धार्मिक तथा ऐतिहासिक मठमन्दिर, चौतारी पोखरी र अन्य ऐतिहासिकस्थलको पुनःनिर्माण तथा संरक्षणको काम सुरु गरेको हो ।
यसै क्रममा नगरपालिका–७ भित्रका सयवर्ष पुराना पोखरी उत्खनन गरी पुनः निर्माणको काम अघि बढाइएको वडाअध्यक्ष रमेश श्रेष्ठले जानकारी दिनुभयो । मङ्गलाघाटस्थित म्याग्दी नदी माथिको तीन सय ३४ वर्ष पुरानो झोलुङ्गे पुलको पुनः मर्मतलगायत धार्मिक मान्यता र पर्यावरणीय शुद्धतासँग सम्बन्धित वरपिपल, चौतारी र पोखरी संरक्षण तथा मर्मत सम्भारलाई नगरपालिकाले अभियान सञ्चालन गरेका बेनी नगरपालिकाका उपप्रमुख ज्योति लामिछानेले जानकारी दिनुभयो ।
वडा कार्यालयले बेनी–महारानी सडकखण्ड अन्तर्गतको पुरानो पोखरी संरक्षणका लागि चालु आवमा पाँच लाख रुपैयाँ बजेट विनियोजन गरेर संरक्षणको काम थालेको वडाअध्यक्ष रमेश श्रेष्ठले बताउनुभयो । “पोखरी आसपासमा मर्मतकार्य जारी छ, चौतारी र पोखरीमा घुम्न मिल्ने गरी पूर्वाधार बनाउँछौँ”, वडा अध्यक्ष श्रेष्ठले भन्नुभयो । पोखरी आसपास क्षेत्रमा तारजाली संरक्षण गरी बस्न मिल्ने संरचना र पोखरीमा पानी जम्मा गरिनेछ ।
नगरपालिका–६ का वडाअध्यक्ष कृष्णबहादुर बानियाँले आफ्नो वडाभित्रका ऐतिहासिक, प्राकृतिक र धार्मिक महत्वका सम्पदाको संरक्षण अभियान नै सुरु गर्नुभएको छ । हालसम्म २० वटा पुराना चौतारीको पुनःनिर्माण, सातवटा नयाँ चौतारी निर्माण, पानीका मुलको संरक्षण, पोखरी पुनःनिर्माण गरिसकिएको उहाँले जानकारी दिनुभयो ।
