साङ्केतिक फाइल तस्वीर
काठमाडौं — आगामी वैशाख १० गते हुने उपनिर्वाचनका लागि उम्मेदवारी दर्ता गराएका उम्मेदवारविरुद्ध उजुरी दिने समय तोकेको छ । निर्वाचन आयोगले सार्वजनिक गरेको उपनिर्वाचनको कार्यतालिका अनुसार हिजो सोमबार उम्मेदवारी दर्ता गराएका उम्मेदवारहरुविरुद्ध उजुरी दिनका लागि आज चैत २१ गते मङ्गलबारको दिनलाई समय तोकिएको हो ।
वैशाख १० गते आइतबार चितवन निर्वाचन क्षेत्र नम्बर –२, तनहुँ निर्वाचन क्षेत्र नम्बर –१ र बारा निर्वाचन क्षेत्र नम्बर–२ मा प्रतिनिधिसभा सदस्य पदका लागि उपनिर्वाचन हुँदैछ । उक्त निर्वाचनका लागि हिजो सोमबार उम्मेदवारी दर्ता गरेका उम्मेदवारप्रति चित्त नबुझेमा उजुरी दिन सकिने र परेका उजुरीमाथि भोलि चैत २२ गते बुधबार छानविन गरी सोही दिन अपरान्ह उम्मेदवारको नामावली प्रकाशन गर्ने आयोगले सार्वजनिक गरेको निर्वाचन कार्यतालिकामा उल्लेख छ ।
उम्मेदवारी फिर्ता लिन इच्छुकका लागि भोलि चैत २३ गते बिहान ९ बजेदेखि दिउँसो १ बजेसम्मको समय तोकिएको छ । आगामी बैशाख १० गते बिहान ७ बजेदेखि साँझ ५ बजेसम्म उपनिर्वाचनका लागि मतदान गराउने निर्वाचन आयोगको तयारी छ ।
वैशाख १० गते हुने तीन निर्वाचन क्षेत्रमा ६९ जनाको उम्मेदवारी परेको आयोगले जनाएको छ । आयोगका अनुसार चितवन निर्वाचन क्षेत्र नम्बर –२ मा राजनीतिक दलसँग सम्बद्ध १२ जना र स्वतन्त्र १२ जना गरी २४ जनाले उम्मेदवारी दर्ता गराएका छन् । यसैगरी तनहुँ निर्वाचन क्षेत्र नम्बर –१ मा दलसँग आवद्ध नौ जनाको उम्मेदवारी परेको छ भने बारा निर्वाचन क्षेत्र नम्बर–२ सबैभन्दा धेरै ३६ जनाको उम्मेदवारी परेको छ । जसमध्ये विभिन्न राजनीतिक दलसँग आवद्ध १२ जना र २४ जना स्वतन्त्रले उम्मेदवारी दर्ता गराएका छन् ।
यसरी उम्मेदवारी दिनेमा, नेपाली काङ्ग्रेस, नेकपा एमाले, राष्ट्रिय स्वतन्त्र पार्टी, राष्ट्रिय प्रजातन्त्र पार्टीलगायतका दलहरु छन् । उपनिर्वाचनमा सरकारको नेतृत्व गरेको नेकपा माओवादी केन्द्रले कुनैपनि क्षेत्रमा उम्मेदवारी दर्ता गराएको छैन ।
तीनै क्षेत्रको उपनिर्वाचन यतिखेर प्रतिष्ठाको लडाई बनेको छ । तीन वटै निर्वाचन क्षेत्रमा गठबन्धनका ठूला दलका साझा उम्मेदवार र अन्य साना दलका उम्मेदवारबीच प्रतिस्पर्धा हुने देखिएको छ । तनहुँ —१ र चितवन —२ मा गठबन्धनका मुख्य दलहरुले नेपाली काङ्ग्रेस र बारा—२ मा गठबन्धनका साझा उम्मेदवार जनता समाजवादीका अध्यक्ष उपेन्द्र यादवलाई बनाएका छन् । गठबन्धनमै रहेको जनमत पार्टीले यादवका विरुद्ध उम्मेदवार उभ्याएको छ ।
यता चितवन, तनहुँ र बारामा गठबन्धनकै अर्को दल राष्ट्रिय स्वतन्त्र पार्टीले समेत उम्मेदवारी दिएको छ । यसरी हेर्दा उपनिर्वाचन हुने तीन वटै क्षेत्रमा दलहरुबीच प्रतिष्ठाको लडाइँ हुने देखिन्छ ।
