रास्वपाका सभापति रवि लामिछाने, फाइल तस्वीर
काठमाडौं — पूर्व गृहमन्त्री एवम् राष्ट्रिय स्वतन्त्र पार्टी (रास्वपा) का सभापति रवि लामिछानेमाथि राहदानी प्रकरणमा मुद्दा नचलाउने निर्णयविरुद्ध सर्वोच्च अदालतमा दर्ता भएको रिटमाथिसुनुवाइ हुने भएको छ । रास्वपाका सभापति लामिछानेको राहदानी प्रकरणमा मुद्दा नचलाउने निर्णयविरुद्ध सर्वोच्च अदालतले उक्त रिटमाथि आज मङ्गलबार सुनुवाई हुनेभएको हो ।
अमेरिकी नागरिक नै रहेको अवस्थामा लामिछानेले नेपालको राहदानी लिएको विषयमा सोविरुद्धको सोमबार सर्वोच्च अदालतमा रिट दर्ता भएको थियो । लामिछानेविरुद्ध रिट निवेदन लिएर युवराज पौडेल ‘सफल’ आइतबार सर्वोच्च अदालत पुगेका थिए । तर उक्तदिन रिट दर्ता भएन । मुख्य रजिस्ट्रारले रिट अध्ययन गरेपछि त्यसको भोलिपल्ट अर्थात् हिजो सोमबार रिट दर्ता भयो र सोही रिटमाथि आज सुनुवाई हुँदैछ ।
अमेरिकी नागरिक नै रहेको अवस्थामा नेपालको राहदानी लिएको विषयमा लामिछाने उपर कानुन बमोजिम छानविन गरी मुद्दा दायर गर्नु भन्दै विपक्षीहरूका नाममा परमादेश जारी गर्नुपर्ने भन्दै पौडेलले आफ्नो रिटमा माग गरेका छन् ।
आफू अमेरिकी नागरिक हुँदाहुँदै नेपाली नागरिकता पेश गरी पासपोर्ट निवेदन फारम भरी नेपाली राहदानी प्राप्त गर्नु राहदानी ऐन, २०२४ को दफा ५(ख) विपरीतको कार्य र कसुर हो भन्ने कुरामा विवाद किनारा लाग्दा नलाग्दै महान्यायाधिवक्ताले रास्वपाका सभापति रवि लामिछाने उपर मुद्दा नचलाउने निर्णय गर्नु दुराग्रहपूर्ण छ भन्ने प्रस्ट रहेको भनि जिकिर गर्दै पौडेलले रिटमा उल्लेख गरेका छन् ।
त्यस्तै राहदानी प्राप्त गर्ने कार्यमा लामिछानेको आपराधिक मनसाय नरहेको भनेर महान्यायाधिवक्ताले आफ्नो क्षेत्राधिकारभन्दा बाहिर गएर निष्कर्ष निकालेको कुरा पनि रिट निवेदनमा उल्लेख गरिएको छ ।
सभापति लामिछानेले उक्त राहदानी कुन–कुन समयमा के र कुन प्रयोजनका लागि प्रयोग (दुरुपयोग) गरेका थिए भन्ने विवरण अध्यागमन विभागबाट झिक्नुपर्ने रिटकर्ता पौडेलको माग छ । दोहोरो छलफल नभएसम्म लामिछानेलाई नेपाली नागरिकको रूपमा राजनीतिक अधिकार प्रयोग गर्न नदिनु भनी सर्वोच्च अदालत नियमावली २०७४ को नियम ४९ बमोजिम निर्वाचन आयोग लगायतका विपक्षीहरूका नाममा अन्तरिम आदेश जारी गर्न रिट निवेदक पौडेलले माग गरेका छन् ।
