फाइल तस्वीर
काठमाडौं — सत्तारुढ दल नेपाली काङग्रेसको केन्द्रीय कार्यसम्पादन समितिको बैठक बस्दैछ । ललितपुरको सानेपास्थित पार्टी मुख्यालयमा आज आईतबार बिहान १० बजे बैठक बस्ने भएको हो ।
काङ्ग्रेस पार्टी मुख्यालयका मुख्यसचिव कृष्णप्रसाद पौडेलका अनुसार आगामी वैशाख १० गते हुने उपनिर्वाचन र काङ्गे्रसले सरकारमा पठाउन बाँकी चार मन्त्रीहरुको नाम तय गर्ने मुख्य एजेण्ड रहेका छन् ।
बारा निर्वाचन क्षेत्र नम्बर २ मा उम्मेदवारी दिने वा गठबन्धनको सहयात्री दल जनता समाजवादी पार्टीका उम्मेदवारलाई समर्थन गर्ने भन्ने बारे आजको बैठकले निर्णय गर्नेछ । काङ्ग्रेसले उपनिर्वाचनका लागि तनुहँ निर्वाचन क्षेत्र नम्बर १ मा गोविन्द भट्टराई र चितवन निर्वाचन क्षेत्र नम्बर २ मा जीतनारायण श्रेष्ठलाई उम्मेदवार बनाउने निर्णय भैसकेको छ । केन्द्रीय कार्यसम्पादन समितिको बैठकले उपनिर्वाचनको तयारीका लागि केही नेताहरुलाई जिम्मेवारी दिने निर्णय पनि गर्ने बताइएको छ ।
गठबन्धनको सरकारमा नेपाली काङ्ग्रेसले पाएको आठ मन्त्रालयमा तीन मन्त्रालय आफ्नो समूहले पाउनुपर्ने भन्दै संस्थापन इतर पक्षका नेता डा.शेखर कोइराला—महामन्त्री गगन थापासमूहले मन्त्रीको नाम पठाएको छैन । बैठकमा पार्टीले पाएको थप चार मन्त्रालयमा कसकसलाई पठाउने भन्ने विषयमा पनि छलफल गरी आजै टुङ्गो लगाउने बताइएको छ ।
