एमाले नेता डा. भीम रावल, फाइल तस्वीर
काठमाडौं – नेपाल कम्युनिस्ट पार्टी (एमाले)ले पार्टीका पूर्वउपाध्यक्ष एवम् पार्टी गतिविधिमा निस्कृय रहनु भएका नेता डा.भीम रावलसँग छलफल गर्न तीन सदस्यीय टोली गठन गरेको छ । पार्टीको आज शनिबार बसेको सचिवालय बैठकले रावलसँग छलफल गरेर वास्तविकता बुझेर आवश्यक निर्णय गर्न वार्ता टोली गठन गरेको हो ।
एमाले पार्टीले गठन गरेको तीन सदस्यीय टोलीको संयोजकमा उपाध्यक्ष विष्णुप्रसाद पौडेल र सदस्यहरुमा पार्टीका सचिव एवम् सुदूरपश्चिम प्रदेश कमिटीका इञ्चार्ज लेखराज भट्ट र सहइञ्चार्ज कर्ण थापा रहनुभएको छ ।
केन्द्रीय कार्यालय च्यासलमा आज केन्द्रीय सचिवालय बैठकले नेता रावल पार्टीको विधि र विधानविपरीत चलेको निष्कर्ष निकाल्दै संवादका लागि वार्ता टोली बनाएको हो । नेता रावल पछिल्लो समय एमालेमा जिम्मेवारी मुक्त हुनुहुन्छ । तर उहाँले एमाले पार्टी विरुद्धका गतिविधि सञ्चालन गर्दै आउनु भएको नेतृत्वको ठम्याइ छ ।
नेता रावलसँग सम्वाद गरेर उहाँका सम्बन्धमा आवश्यक निर्णय लिनसक्ने गरी काम गर्ने अधिकार सचिवालयले दिएको बताइएको छ । नेता रावलले पाँच महिना अघिसम्म प्रतिनिधिसभा र प्रदेशसभा निर्वाचनमा पनि पार्टीलाई असहयोग गर्दै एमाले उम्मेदवारलाई नै हराउन लागिपरेको आरोप लाग्दैआएको छ ।
रावलमाथि स्थानीय पार्टी नेता तथा कार्यकर्ताको गुनासो आएपछि एमालेले उच्चस्तरीय वार्ता टोली नै गठन गरेर नेता रावलका विषयमा छिनोफानो गर्नेभएको छ । पूर्वउपाध्यक्ष समेत रहनुभएका रावललाई सम्भवत पार्टीले स्पस्टीकरण सोध्नेछ । त्यसपछि उहाँमाथि कारवाहीको प्रक्रिया अघि बढ्नसक्ने सचिवालयक एक सदस्यले बताएका छन् ।
