फाइल तस्वीर
काठमाडौं — प्रमुख प्रतिपक्षी दल नेपाल कम्युनिस्ट पार्टी (एमाले) आगामी वैशाख १० गते हुने उपनिर्वाचनका उम्मेदवार चयन गरेको छ । एमालेको आज बसेको सचिवालय बैठकले तनहुँ निर्वाचन क्षेत्र नम्बर १ का लागि पूर्वप्रहरी प्रमुख सर्वेन्द्र खनाल र चितवन निर्वाचन क्षेत्र नम्बर २ को लागि जिल्ला पार्टी अध्यक्ष रामप्रसाद न्यौपानेलाई उम्मेदवार छनोट गरेको हो ।
एमालेले बारा निर्वाचन क्षेत्र नम्बर २ मा भने उम्मेदवारका बारेमा केही निर्णय नलिएको बताइएको छ । बारा १ को उम्मेदवारबारे पछि छलफल गरेर टुङ्ग्याउने एमालेले जनाएको छ ।
एमालेले तनहुँबाट उम्मेदवार बनाएका सर्वेन्द्र खनाल गत मङ्सिर ४ गते सम्पन्न प्रतिनिधिसभा सदस्यको निर्वाचनमा काठमाडौं निर्वाचन क्षेत्र नम्बर ६ बाट पराजित भएका थिए । पुर्ख्यौली घर तनहुँ घरभएका खनाललाई एमालेले एमालेले दोस्रो पटक उम्मेदवार बनाउने निर्णय गरेको छ ।
वैशाख १० गते चितवन निर्वाचन क्षेत्र नम्बर २, बारा निर्वाचन क्षेत्र नम्बर २ र तनहुँ निर्वाचन क्षेत्र नम्बर १ मा उपनिर्वाचन हुँदैछ । गत मङ्सिर ४ गते सम्मन्न निर्वाचनमा चितवन २ बाट प्रतिनिधिसभा सदस्यमा निर्वाचित राष्ट्रिय स्वतन्त्र पार्टीका अध्यक्ष रवि लामिछाने नागरिकता विवादमा मुछिएपछि सर्वोच्च अदालतको निर्णयले लामिछानेको सांसद् पद खारेज भएको थियो ।
तनहुँ १ बाट निर्वाचित नेपाली काङ्ग्रेसका वरिष्ठ नेता रामचन्द्र पौडेल राष्ट्रपतिमा र बारा २ बाट निर्वाचित जनता समाजवादीका रामसहाय यादव उपराष्ट्रपतिमा निर्वाचित भएपछि रिक्त रहन पुगेको प्रतिनिधिसभा सदस्यका लागि यी तीन वटै क्षेत्रमा वैशाख १० गते उपनिर्वाचन हुन लागेको हो । निर्वाचन आयोगले उपनिर्वाचनका लागि चैत २० गते उम्मेदवारी मनोनयन गर्ने कार्यतालिका सार्वजनिक गरिसकेको छ ।
नेकपा माओवादी केन्द्रले पनि पार्टी कार्यालय मुख्य सचिव श्रीराम ढकाललाई तनहुँ १ को लागि उम्मेदवार बनाउन प्रस्ताव गरेको थियो । ढकालले पार्टीको उक्त प्रस्तावलाई अस्वीकार गर्नुभएको छ ।
