फाइल तस्वीर
ललितपुर — नेपाल कम्युनिस्ट पार्टी(एमाले) निकट पेसागत महासङ्घ नेपालको सातौं महाधिवेशन आगामी बिहीबारदेखि हुने भएको छ । ‘स्वाधीन अर्थतन्त्र र समृद्ध जीवनका लागि गुणस्तरीय सेवा र जिम्मेवार ट्रेड युनियन’ भन्ने नाराका साथ उक्त महाधिवेशन ललितपुरको जावलाखेलमा हुन लागेको हो ।
महाधिवेशन दुई दिनसम्म चल्ने उक्त महाधिवेशनको उद्घाटन एमालेका अध्यक्ष केपी शर्मा ओलीले उद्घाटन गर्नुहुने कार्यक्रम रहेको छ । महासङ्घका राष्ट्रिय संयोजक बाबुराम थापाका अनुसार उक्त कार्यक्रममा प्रतिष्ठान, राष्ट्रिय सङ्घ, प्रदेश र जिल्लाबाट गरी करिब नौ सय प्रतिनिधि सहभागी हुने छन् । महाधिवेशनले पेसाकर्मीका समस्या समाधानका उपाय, प्रतिष्ठानको व्यवस्थापन, नेपालको कमजोर अर्थतन्त्रले पेसाकर्मीलाई पारेको प्रभावलगायत विषयमा समीक्षा गरी आगामी कार्यक्रम, नीतिनिर्माणसहित नयाँ नेतृत्व चयन गर्नेछ ।
नेपालका समाजवादी विचारसँग आबद्ध पेसाकर्मीको सङ्गठन महासङ्घमा २६ राष्ट्रिय घटक, ५२ प्रतिष्ठान, आठ प्रदेश कमिटी र सात सय ५३ पालिकास्तरीय कमिटी रहेका छन् । मुलुकभरि यसमा आबद्ध करिब छ लाख सदस्य छन् । विसं २०७७ माघ २४ गते देशभरका एक हजार आठ सय प्रतिनिधिको उपस्थितिमा तीन सय ११ सदस्यीय सातौँ राष्ट्रिय महाधिवेशन आयोजक समिति गठन गरिएको थियो । महासङ्घको स्थापना २०५२ चैत ६ गते भएको थियो ।
