नवनियुक्त मन्त्रीहरुको शपथ ग्रहण तस्वीर
काठमाडौं — प्रधानमन्त्री पुष्पकमल दाहाल ‘प्रचण्ड’ले मन्त्रिमण्डल विस्तार गर्नुभएको छ । नवनियुक्त मन्त्रीहरुले केहीबेर अघिमात्रै पद तथा गोपनीयताको शपथ लिनुभएको छ । प्रधानमन्त्री प्रचण्डले आज शुक्रबारसमेत गरी सातौं पटक मन्त्रिमण्डल पुनर्गठन र विस्तार गर्नुभएको हो ।
महाराजगञ्जस्थित राष्ट्रपति भवन शितल निवासमा राष्ट्रपति रामचन्द्र पौडेलले नवनियुक्त मन्त्रीहरुलाई पद तथा गोपनीयताको शपथ गराउनुभएको हो ।
गत पुस १० गते प्रधानमन्त्रीमा नियुक्त हुनुभएका प्रचण्डले शुक्रबार मन्त्रिमण्डल विस्तार गर्नुभएता पनि सरकारले अझै पूर्णता पाउन सकेन । गठबन्धनका मध्ये केहीबाट सरकारमा पठाउने मन्त्रीहरुको नाम दिन नसक्दा मन्त्रिपरिषद्ले अझै पूर्णता पाएको छैन । प्रधानमन्त्री प्रचण्ड नेतृत्वको सरकारमा दुई जना उपप्रधानमन्त्री बनाइएका छन् । उपप्रधानमन्त्रीको पहिलो नम्बरमा नेपाली काङ्ग्रेसका उपसभापति पूर्णबहादुर खड्का र दोस्रो नम्बरमा नेकपा माओवादी केन्द्रका नारायणकाजी श्रेष्ठ रहनुभएको छ ।
खड्कालाई उपप्रधानमन्त्रीसहित रक्षा मन्त्रालयको जिम्मेवारी दिइएको छ भने उपप्रधानमन्त्री श्रेष्ठलाई गृह मन्त्रालयको जिम्मेवारी दिइएको छ । मन्त्री श्रेष्ठको जिम्मेवारी फेरिएको हो । यस अघिउहाँले भौकि योजना मन्त्रालयको जिम्मेवारी सम्हाल्नु भएको थियो ।
पुर्नगठित मन्त्रीमण्डलमा काङग्रेसका पूर्णबहादुर खड्का उपप्रधानसहित रक्षा, नेकपा एकीकृत समाजवादीका डा. बेदुराम भुसाल कृषि तथा पशुपन्छी, जसपाका अशोक राई शिक्षा, लोसपाका शरदसिंह भण्डारी श्रम तथा रोजगार,कांग्रेसका डा. प्रकाशसरण महत अर्थ, नेसपाका महिन्द्र राययादव महिला बालबालिका, माओवादीका शक्ति बस्नेत ऊर्जा तथा जलश्रोत, एकीकृत समाजवादीका प्रकाश ज्वाला, भौतिक योजना, नागरिक उन्मुक्तीका रञ्जिता श्रेष्ठ भूमि व्यवस्था, कांङग्रेसका रमेश रिजाल उद्योग र काङ्ग्रेसकै सिता गुरुङले सहरी विकास मन्त्रालयको जिम्मेवारी पाएका छन् । माओवादीका चार मन्त्री पुरानै मन्त्रालयको जिम्मेवारीमा रहेका छन् ।
प्रधानमन्त्री प्रचण्डले ५ वटा मन्त्रालय भने आफैसँग राखेका छन् । जसमा कानुन न्याय तथा संसदीय,परराष्ट्र, युवा तथा खेलकुद, वन तथा वातावरण र स्वास्थ्य मन्त्रालय प्रधानमन्त्री प्रचण्डसँगै रहेका छन् ।
