फाइल तस्वीर
काठमाडौं — नेपाली काङ्ग्रेसबाट सरकारमा जाने मन्त्रीहरु र मन्त्रालय टुङ्गो लागेको छ । काङ्ग्रेसले पार्टी उपसभापति पूर्णबहादुर खड्काको नेतृत्वमा सरकारमा जाने निर्णय गर्दै मन्त्री र मन्त्रालयको टुङ्गो लगाएको हो ।
काङग्रेसले आठवटा मन्त्रालय पाएको छ । काङ्ग्रेसले पाएको आठ मन्त्रालयमा रक्षा, परराष्ट्र, अर्थ, सामान्य प्रशासन, भूमि व्यवस्था, सहरी विकास, स्वास्थ तथा जनसङ्ख्या र कानून मन्त्रालय रहेका छन् ।
काङ्ग्रेसले पाएको मन्त्रालयमध्ये परराष्ट्र र रक्षामा अझै कुरा मिलेको छैन । अन्यमन्त्रालयमध्ये अर्थमा डा.प्रकाशशरण महत, सामान्य प्रशासनमा धनराज गुरुङ, भूमि व्यवस्थामा सीता गुरुङ, सहरी विकासमा नारायणप्रसाद साउद, स्वास्थ्य तथा जनसङ्ख्यामा मोहनबहादुर बस्नेत र कानुन मन्त्रालयमा डिगबहादुर लिम्बुलाई जिम्मेवारी दिने भएको छ ।
उपसभापति पूर्णबहादुर खड्काको भागमा उपप्रधानसहित परराष्ट्र वा रक्षा मन्त्रालयमध्ये एउटा मन्त्रालय हुनेछ । खड्का असन्तुष्ट भएका कारण आज मन्त्री नियुक्तिको कुरा हुन नसकेको एक नेताले बताएका छन् ।
गठबन्धनको भागवण्डामा काङ्ग्रेसलाई आठ, माओवादी केन्द्रलाई प्रधानमन्त्री सहित पाँच, नेकपा एकीकृत समाजवादीलाई दुई, जनता समाजवादी पार्टीलाई दुई मन्त्रालय दिनेगरी नेताहरुबीच सहमति भएको छ ।
यसैगरी गठबन्धनका साना दलमध्ये जनमत पार्टीलाई एक राज्यमन्त्रीसहित दुई, लोसपा एक, नागरिक उन्मुक्ति पार्टीलाई एक, आम जनता पार्टीलाई एक र लोसपालाई एक मन्त्रालय दिने सहमति भएको छ । सरकार विस्तागर्ने क्रममा नेकपा माओवादी केन्द्रले कार्य विभाजन भएपनि पुरानै मन्त्रीहरुलाई निरन्तरता दिने भएको छ ।
भौतिकमन्त्री नाराणकाजी श्रेष्ठ गृह र सामान्य प्रशासनमन्त्री अमनलाल मोदी उर्जामन्त्री बन्ने छन् । एकीकृत समाजवादीले भौतिक पूर्वाधार र वन नेपाल समाजवादी पार्टीले खानेपानी तथा सरसफाइ मन्त्रालय, जनमत पार्टीले उद्योग, नागरिक उन्मुक्ति पार्टीले युवा तथा खेलकुद, जसपाले शिक्षा र कृषि मन्त्रालय‚ लोसपाले श्रम मन्त्रालय पाउनेगरी गठबन्धनमा सहमति भएको बताइएको छ । भोलि मन्त्रिपरिषद् विस्तार हुने र सबै मन्त्रीहरुको भोलि नै पद तथा गोपनीयताको शपथ ग्रहण हुने कार्यक्रम बनेको स्रोतको भनाइ छ ।
