काठमाडौं — नेपाल कम्युनिस्ट पार्टी (एमाले)ले प्रधानमन्त्री पुष्पकमल दाहाल ‘प्रचण्ड’लाई विश्वासको मत नदिने निर्णय गरेको छ । काठमाडौंको नयाँबानेश्वरस्थित संसद् भवनमा आज बसेको एमाले संसदीय दलको बैठकले विश्वासको मत दिन नसक्ने निर्णय गरेको हो । एमालेका सचेतक महेश बर्तौलाले जानकारी दिनुभयो ।
बैठकपछि एमालेका सचेतक महेश बर्तौलाले भन्नुभयो, ‘सरकारलाई विश्वासको मत नदिने निर्णय भएको छ ।’ उहाँका अनुसार बैठकले सरकारले स्थिरता, विकास र समृद्धिका पक्षमा विश्वास लाग्दो आधार निर्माण गर्ने परिस्थिति विकास नगरेकाले मत दिन नसकिने निर्णय भएको हो ।
संसद्भित्र जनता र देशको भावनालाई प्रतिपक्षको बेञ्चबाट सशक्त, सिर्जनात्मक र रचनात्मक भूमिका निर्वाह गर्ने, सरकारलाई संसद्प्रति जवाफदेही बनाउने, संसदीय मूल्य मान्यतालाई स्थापित गर्दै अघि बढ्ने निर्णय भएको उहाँको भनाइ छ । 
