साङ्केतिक तस्वीर
काठमाडौं — सिन्धुली जिल्लाको फिक्कल गाउँपालिकामा बस दुर्घटना भएको छ । ओखलढुङ्गाबाट काठमाडौं आउँदै गरेको बा २ ख ६५९६ नम्बरको यात्रुबाहक बस फिक्कल गाउँपालिका–४ कुहिभीरमा दुर्घटनामा परेको हो ।
उक्त दुर्घटनामा परी ५ जनाको मृत्यु भएको जिल्ला प्रहरी कार्यालय, सिन्धुलीले जनाएको छ । मृत्यु हुनेमा २ महिला, २ पुरुष र १ बच्चा रहेको जिल्ला प्रहरी कार्यालय सिन्धुलीले जनाएको छ । बसमा सवार २४ जना घाइते भएका छन् ।
सिन्धुलीका प्रमुख प्रहरी उपरीक्षक राजकुमार सिलवालका अनुसार उक्त बस ब्रेक फेल भएर दुर्घटना भएको हो । घाइतेको उद्धार गरी प्राथमिक उपचारका लागि खुर्कोट लगिएको छ । घाइते रहेकामध्ये ५ जनाको अवस्था गम्भीर रहेको बताइएको छ ।
