फाइल तस्वीर
काठमाडौं – प्रधानमन्त्री एवं नेपाल कम्युनिस्ट पार्टी माओवादी केन्द्रका अध्यक्ष पुष्पकमल दाहाल ‘प्रचण्ड’विरुद्धको रिटको सुनुवाइ आज हुने भएको छ । हिजो बिहीबार हेर्न नभ्याउने भन्दै स्थगित भएको सो रिटको पेशी आज तोकिएको हो ।
बिहीबार सर्वोच्च अदालतका न्यायाधीश विश्वम्भरप्रसाद श्रेष्ठको इजलासमा रिट परेको थियो । तर, न्यायाधीश अनिलकुमार सिन्हासँगको संयुक्त इजलासमा अरू मुद्दा सुनुवाइ गरेका न्यायाधीश श्रेष्ठले प्रचण्डविरुद्धको रिट हेर्न नभ्याइने सूचीमा राखेपछि आजका लागि सारिएको हो ।
नेकपा माओवादी केन्द्रका अध्यक्षसमेत रहनुभएका प्रचण्डले तीन वर्षअघि माघी पर्वका अवसरमा काठमाडौंको टुँडिखेलमा आयोजित एक कार्यक्रममा द्वन्द्वकालमा मारिएका १७ हजार को आरोप आफूलाई लाग्ने गरेको भन्दै सामन्तीहरूले १२ हजार मारेको जिम्मा लिने भए पाँच हजारको जिम्मा आफू लिन तयार रहेको बताउनुभएको थियो ।
सोही अभिव्यक्तिलाई लिएर अधिवक्ताद्वय ज्ञानेन्द्र आरण र कल्याण बुढाथोकीलगायत द्वन्द्वपीडितले सर्वोच्चमा दुई वटा रिट दायर गरेका छन् । यस्ता रिट निवेदन पटक–पटक दरपिठ भए पनि दरपिठ भएको आदेशविरुद्ध नै मुद्दा परेपछि न्यायाधीश ईश्वरप्रसाद खतिवडा र हरिप्रसाद फुयाँलको फागुन १९ गते शुक्रबारको इजलासले प्रचण्डले दिएको अभिव्यक्तिविरुद्धको रिट दर्ताका लागि सर्वोच्च प्रशासनलाई आदेश दिएको थियो ।
सर्वोच्चमा रिट दर्ता भएपछि माओवादी घटक दल एकै मोर्चामा सामेल भएर सो मुद्दा अदालतले हेर्न नहुने बताइरहेका छन्।
