सिन्धुपाल्चोक — नेपाल विद्युत् प्राधिकरणले सिन्धुपाल्चोकको बाह्रबिसेमा निर्माणाधीन २२० केभी सबस्टेसन निर्माणको ठेक्का पाएको चिनियाँ कम्पनीहरू ग्वाङसी ट्रान्समिसन एन्ड सबस्टेसन कन्ट्रक्सन र सेन्जेन क्लाउ इलेक्ट्रोनिक्सको काम सन्तोषजक नभएकोे जनाएको छ । प्राधिकरणका कार्यकारी निर्देशक कुलमान घिसिङले बुधबार सबस्टेसन निर्माणस्थलको निरीक्षण भ्रमणमा चिनियाँ कम्पनीहरू ग्वाङसी ट्रान्समिसन एन्ड सबस्टेसन कन्ट्रक्सन र सेन्जेन क्लाउ इलेक्ट्रोनिक्सको काम सन्तोषजक नभएकोे भन्दै आगामी असारभित्र निर्माण सक्न ती कम्पनीहरूलाई चेतावनी दिनुभएको हो ।
चिलिमे जलविद्युत् कम्पनीको अगुवाइमा सिन्धुपाल्चोकमा निर्माणाधीन १०२ मेगावाटमध्ये भोटेकोसी जलविद्युत् आयोजनाको विद्युत् बाह्रबिसे सबस्टेसनमा जोडिने छ । आयोजना असारभित्रमा निर्माण सम्पन्न गर्ने लक्ष्यका साथ निर्माण भइरहेको छ । यो सबस्टेसन निर्माण नभएमा मध्यभोटेकोसीको विद्युत् राष्ट्रिय प्रसारण प्रणालीमा जोड्न नसकी खेर जानेछ ।
कार्यकारी निर्देशक घिसिङले त्यस्तो अवस्था आएमा १०२ मेगावाटको विद्युत् आयोजनाले बिक्री गरेर दैनिक रूपमा प्राप्त हुने आम्दानी हिसाब गरी ठेकेदार कम्पनीले बेहोर्नुपर्ने चेतावनी दिनुभएको छ ।
