काठमाडौं – प्रतिनिधिसभाको बैठक आज बस्दै छ । बैठक काठमाडौंको नयाँबानेश्वरस्थित सङ्घीय संसद् भवनमा बिहान ११ बजे बस्ने भएको हो । आज बस्ने बैठकका लागि संसद् सचिवालयले तीन वटा कार्यसूची सार्वजनिक गरेको छ ।
बैठकको सुरुमा सांसद प्रेम सुवालले ‘सम्पत्ति शुद्धीकरण (मनी लाउण्डरिङ) निवारण तथा व्यावसायिक वातावरण प्रवर्धनसम्बन्धी केही ऐनलाई संशोधन गर्ने विधेयक, २०७९’ प्रस्तुत गर्न अनुमति माग्ने प्रस्तावमाथि राखेको विरोधको सूचना निर्णयार्थ प्रस्तुत गर्नुहुने कार्यसूची रहेको छ ।
त्यसपछि कानुन, न्याय तथा संसदीय मामिला मन्त्री ध्रुवबहादुर प्रधानले ‘सम्पत्ति शुद्धीकरण (मनी लाउण्डरिङ) निवारण तथा व्यावसायिक वातावरण प्रवर्धनसम्बन्धी केही ऐनलाई संशोधन गर्ने विधेयक, २०७९’ पेस गर्ने सम्भावित कार्यसूची रहेको छ ।
यस्तै कृषि तथा पशुपन्छी विकास मन्त्री ज्वालाकुमारी साहले राष्ट्रिय सभाबाट सन्देशसहित प्राप्त ‘खाद्य स्वच्छता तथा गुणस्तर विधेयक, २०७८ माथि विचार गरियोस्’ भनी प्रस्ताव प्रस्तुत गर्ने सम्भावित कार्यसूची रहेको पनि संसद् सचिवालयले जनाएको छ ।
