फाइल तस्वीर
काठमाडौं – सरकारको नेतृत्व गरेको नेपाल कम्युनिस्ट पार्टी माओवादी केन्द्रले राष्ट्रिय स्वतन्त्र पार्टी (रास्वपा) ले केही समय धैर्य गर्नुपर्ने निष्कर्ष निकालेको छ । माओवादी केन्द्रको कोटेश्वरस्थित पार्टी मुख्यालय पेरिसडाँडामा बसेको स्थायी समितिको बैठकले अदालतको पूर्वपाठ नआउँदासम्म धैर्य गर्नुपर्ने ठम्याएको हो ।
रास्वपाका अध्यक्ष रवि लामिछानेको नागरिकता प्रकरणमा सर्वोच्च अदालतले गरेको मुद्दाको फैसलाको पूरा पाठ नआउँदासम्म सो पार्टीले धैर्य गर्नुपर्ने नेकपा (माओवादी केन्द्र) ले जनाएको छ ।
पार्टी केन्द्रीय कार्यालय पेरिसडाँडामा आज बसेको स्थायी कमिटीको बैठकबारे जानकारी दिँदै केन्द्रका प्रवक्ता कृष्णबहादुर महराले रास्वपाका अध्यक्ष लामिछानेको नागरिकतासम्बन्धी फैसलाको पूर्णपाठ नआउञ्जेलसम्म फेरि गृहमन्त्री हुनेबारे धैर्य गर्नुपर्ने विषयमा पार्टीमा छलफल भएको बताउनुभयो ।
‘रास्वपाले धैर्यता गर्नुपर्छ, किनभने मुद्दाको पूर्णपाठ आएको छैन, मुद्दा सकिएको पनि छैन, मन्त्रिमण्डलमा के गर्ने भन्ने विषयमा निर्णय गर्न बाँकी नै छ’ उपाध्यक्ष महराले भन्नुभयो, ‘सो विषयमा उहाँका भनाइ आएका छन्, तर त्यो भनाइले सत्ता साझेदार दलबीचमा कुनै समस्या पैदा भएको छैन ।’
सरकारमा रहने वा सरकारबाट बाहिरिने भन्नेबारे निर्णय गर्न रास्वपाको केन्द्रीय समिति र पार्टी संसदीय दलको संयुक्त बैठक अहिले वसुन्धरास्थित पार्टी कार्यालयमा बसिरहेको छ । रास्वपाबाट हाल श्रम, रोजगार तथा सामाजिक सुरक्षामन्त्री डोलप्रसाद अर्याल, शिक्षामन्त्री शिशिर खनाल र स्वास्थ्य राज्यमन्त्री डा तोसिमा कार्की हुनुहुन्छ ।
सर्वोच्च अदालतले माघ १३ गते उपप्रधान एवम् गृहमन्त्री लामिछानेको नागरिकतासम्बन्धी मुद्दामा दोषी ठहर गरेपछि मन्त्री तथा सांसद् र पार्टी सभापति पद गुमेको थियो । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ नेतृत्वको सरकारमा लामिछाने ११ पुसमा उपप्रधान तथा गृहमन्त्री बन्नुभएको थियो ।
यही माघ १५ गते काठमाडौँ जिल्ला प्रशासन कार्यालयबाट कानुनबमोजिम लामिछानेले पुनः नागरिकता लिइसक्नुभएको छ । नागरिकता प्रकरणमा लामिछानेले उपप्रधानमन्त्री तथा गृहमन्त्री पद गुमाएपछि रास्वपाले फेरि उक्त मन्त्रालय आफूहरूलाई नै दिनुपर्ने माग गर्दै आएको छ । गृहमन्त्रालयमा दावी गर्दै आएको छ । रास्वपाका सभापति लामिछाने नै गृहमन्त्रालयमा फर्किने महत्वाकाङ्क्षाले राष्ट्रिय राजनीतिलाई नै तरङ्गित बनाएको छ ।
लामिछानेलाई नै गृहमन्त्री बनाएर आगामी तीन महिना भित्रै चितवन निर्वाचन क्षेत्र नम्बर २ मा हुने उप निर्वाचनमा पुनः लामिछाने लडेर सांसद् बन्ने र गृहमन्त्रीलाई वैध्यता दिने एक खालको खेल पनि भैरहको छ । एमालेले पनि लामिछानेलाई गृहमन्त्री बनाउन दवाव दिंदै आएको छ ।
