काठमाडौं – काठमाडौं उपत्यकाका तीनवटै जिल्लाका प्रमुख जिल्ला अधिकारीको बैठक आज बस्दैछ । दिउँसो बस्ने बैठकले विश्वव्यापी महामारीको रुपमा फैलिएको कोरोना भाइरस (कोभिड–१९) सङ्क्रमण नियन्त्रणका लागि छलफल गर्ने बताइएको छ । काठमाडौं उपत्यकामा सीसीएमसीसीले गरेको सिफारिस कार्यान्वयन गर्नेबारे छलफल हुन लागेको जिल्ला प्रशासन कार्यालय काठमाडौंले जनाएको छ ।
सरकारले सार्वजनिक सेवा प्राप्त गर्नका लागि कोरोनाविरुद्धको खोप कार्ड अनिवार्य गर्न लागेको छ । कोभिड–१९ सङ्कट व्यवस्थापन समन्वय केन्द्र (सीसीएमसीसी) को बैठकले माघ ७ गतेदेखि सार्वजनिक सेवा प्राप्त गर्न खोप कार्ड अनिवार्य गर्न सिफारिस गरेको थियो । त्यस्तै सार्वजनिक स्थानहरु जस्तै कार्यालय, होटेल, रेस्टुरेन्ट, सिनेमा हल रङ्गशाला र पार्कमा पनि खोप कार्ड अनिवार्य गरेको छ । त्यस्तै अन्तर्राष्ट्रिय उडानमा हुने भीडभाड कम गर्न उडान तालिका बनाउन पर्यटन, सँस्कृति तथा नागरिक उड्डयन मन्त्रालयलाई उडान तालिका मिलाउन र आन्तरिक उडानतर्फ खोप कार्ड हुने यात्रुलाई मात्र बोर्डिङ पासको व्यवस्था मिलाउन निर्देशन दिइएको छ ।
बैठकले सार्वजनिक स्थलमा २५ जनाभन्दा बढी भेला हुन रोक लगाउने र राजनीतिक दलहरूलाई ठूला भेला–कार्यक्रम नगर्न, विभिन्न सङ्घ–संस्थालाई महोत्सवलगायत भीड हुने कार्यक्रम नगर्न पनि आह्वान गरिएको छ । यसअघि नै पूर्वनिर्धारित कार्यक्रम भए स्थानीय प्रशासनको अनुमतिमा मात्रै कार्यक्रम गर्ने व्यवस्था गर्न पनि गृह मन्त्रालयलाई सिफारिस गरिएको छ ।
