काठमाडौं – स्वास्थ्य सेवा विभागको महानिर्देशकको जिम्मेवारी फेरि पनि डा. दीपेन्द्ररमण सिंहलाई दिइएको छ । स्वास्थ्य तथा जनसंख्या मन्त्रालयले आजदेखि पदभार ग्रहण गर्ने गरी डा. सिंहलाई विभागको महानिर्देशकको जिम्मेवारी दिएको हो ।
यसअघि, विभागको निमित्त महानिर्देशक रहनुभएका डा. आरपी बिच्छाको उमेर हदका कारण आज नै सेवा अवधि पूरा हुँदै छ । तर, विशेषज्ञको रूपमा डा. बिच्छाको सेवा अवधि दुई वर्ष थप गरिएको छ । यसरी सेवा अवधि थप गरेका कर्मचारीलाई कार्यकारी जिम्मेवारी दिन नमिल्ने व्यवस्था स्वास्थ्य सेवा ऐनमा रहेकाले विभागको महानिर्देशकमा डा. सिंहलाई पठाइएको मन्त्रालयले जनाएको छ ।
डा. बिच्छा नियुक्त हुनुअघि विभागको महानिर्देशक डा.दीपेन्द्ररमण सिंह नै हुनुहुन्थ्यो । तर, शेरबहादुर देउवा प्रधानमन्त्री नियुक्त भएपछि गएको साउन १९ गते १२ औँ तहका डा. सिंहलाई मन्त्रालयमा तानेर ११ औँ तहका डा.बिच्छालाई विभागको निमित्त महानिर्देशकको जिम्मेवारी दिइएको थियो ।
