काठमाडौं – कोभिड–१९ को दोस्रो लहरको नयाँ भेरियन्टले महामारीको रुप लिएसँगै गत बैशाख १६ देखि लगाइएको निषेधाज्ञाका कारण बन्द भएका सार्वजनिक यातायातहरु काठमाडौं उपत्यकामा आजदेखि सञ्चालन हुने भएको छ । जोर–बिजोर प्रणालीअनुसार सार्वजनिक यातायात बिहान ६ देखि बेलुकी ७ बजेसम्म सञ्चालन गर्न दिइने भएको हो ।
कोरोना भाइरसका सङ्क्रमित घट्दै गए पनि जोखिम कायमै रहेको भन्दै काठमाडौं उपत्यकाभित्रका प्रमुख जिल्ला अधिकारीहरूको हिजो सोमबार बसेको बैठकले स्वास्थ्य सुरक्षा मापदण्ड कडाइका साथ पालना गर्दै सार्वजनिक यातायात सञ्चालन गर्न दिने निर्णय गरेको हो ।
उपत्यकाभित्र निषेधाज्ञा भने एक साता थप गरिएको छ । निषेधाज्ञाबीच नै सार्वजनिक सवारी साधन सञ्चालन गर्न दिन लागिएको हो । २५ भन्दा बढी सिट क्षमता भएका सार्वजनिक यातायात सञ्चालन हुन पाउने भएका छन् ।
यसअघिदेखि नै निजी सवारी साधन पनि जोर–बिजोर प्रणालीअनुसार सञ्चालन हुँदै आएका छन् । गत वैशाख १६ देखि काठमाडौं उपत्यकाभित्र निषेधाज्ञा गरिएको थियो । लामो दूरीका सवारी साधन भने सञ्चालन गर्न पाइने छैन । सबै किसिमका पसलहरू बिहान ११ बजेदेखि बेलुकी ६ बजेसम्म खोल्न पाइने भएका छन् ।
