काठमाडौं — प्रतिनिधिसभा बैठक आज दिउँसो १ बजे बस्दैछ । बैठकअघि सभामुख अग्नि सापकोटाले सवा १२ बजे प्रमुख राजनीतिक दलका प्रमुख सचेतक र सचेतकहरुसँग छलफल गर्ने तयारी गर्नुभएको छ ।
प्रत्येक बैठकअघि कार्यव्यवस्था परामर्श समितिको बैठक बस्न नसक्दा सभामुख सापकोटाले प्रमुख सचेतक तथा सचेतकहरुसँग बैठक सञ्चालनबारे सामान्य छलफल गर्ने परम्परा रहेको छ । दलका नेताहरुसँगको छलफलपछि कार्यसूचीमा उल्लेख नगरिएको विशेष समय र शून्य समयको व्यवस्था हुनसक्ने संघीय संसदका कर्मचारीहरुले जानकारी दिएका छन् ।
आजको बैठकमा संसदीय समिति तथा अख्तियार दुरुपयोग अनुसन्धान आयोगको वार्षिक कार्यसूची पेश गर्ने सम्भावित कार्यसूची रहेको छ । त्यस्तै प्रधानमन्त्री केपी शर्मा ओलीका तर्फबाट अख्तियार दुरुपयोग अनुसन्धान आयोगको आर्थिक वर्ष २०७६÷७७ को वार्षिक प्रतिवेदन पेश गर्ने तयारी रहेको छ ।
यसैगरी सार्वजनिक लेखा समितिका सभापति भरतकुमार शाहले सार्वजनिक लेखा समितिको वार्षिक प्रतिवेदन २०७७ पेश गर्ने, राज्यव्यवस्था तथा सुशासन समितिका सभापति शशी श्रेष्ठले संघीय निजामति सेवा विधेयकसम्बन्धी समितिको प्रतिवेदन २०७७ पेश गर्ने सम्भावित कार्यसूची रहेको संघीय संसदका महासचिव डा. भरतराज गौतमले जानकारी दिनुभएको छ ।
