काठमाडौं – कागेश्वरी मनोहरा नगरपालिका –७ अमरसिंह चोकमा मोटरसाइक दुर्घटना हुँदा १ जनाको मृत्यु भएको छ । हरहर महादेवबाट मुलपानीतर्फ गइरहेको बा ९३ प ३३१० नम्बरको मोटरसाइकल अमरसिंह चोकको एक घरको भित्तामा ठोक्किएर दुर्घटना हुँदा चालक सिन्धुली घर भई भक्तपुरको राधेराधे बस्ने ३१ वर्षीय निराजन बरालको मृत्यु भएको छ । बरालको ट्रमा सेन्टरमा गएराति १० बजे मृत्यु भएको प्रहरीले जानकारी दिएको छ । विपरीत दिशाबाट लेन मिचेर आएको बा ५ ख ४०७३ नम्बरको टिपरलाई साइड दिन खोज्दा मोटरसाइकल घरको भित्तामा ठोक्किएको थियो । टिप्पर चालकलाई प्रहरीले नियन्त्रणमा लिएको छ ।