काठमाडौं – सप्तरीको खडक नगरपालिका –११ बनौलीमा ३ जना सवार मोटरसाइकल दुर्घटना भएको छ । दुर्घटनामा परि २ जनाको मृत्यु भएको छ । हुलाकी राजमार्गस्थित सडकमा पश्चिमबाट पूर्वतर्फ जाँदै गरेको प्रदेश २–०१–००१–प ६१४६ नम्बरको मोटरसाइकल आज दुर्घटना हुँदा खडक –११ बनौलीका २१ वर्षीय शिवेन्द्र साह र २५ वर्षीय अरविन्द यादवको ज्यान गएको प्रहरीले जानकारी दिएको छ । दुवै जनाको शबलाई परीक्षणका लागि गजेन्द्रनारायण सिंह अस्पतालमा राखिएको प्रहरीले जनाएको छ ।
मोटरसाइकल अनियन्त्रित भएका कारण दुर्घटना भएको जिल्ला प्रहरी कार्यालयका सूचना अधिकृत प्रहरी नायब उपरीक्षक भुवनेश्वरप्रसाद साहले बताएका छन् । मोटरसाइकलमा पछाडि सवार रहेका सोही ठाउँका २१ वर्षीय सुनिलकुमार चौधरी गम्भीर घाइते भएका छन् । उनको टाउको र शरीरको विभिन्न भागमा चोटपटक लागेको छ । उनलाई उपचारका लागि छिन्नमस्ता अस्पताला भर्ना गरिएको रमेत प्रहरीले जानकारी दिएको छ ।
