नेपाल कम्युनिस्ट पार्टी(नेकपा) का अध्यक्ष समेत रहेका प्रधानमन्त्री केपी शर्मा ओलीले आज दिउँसो कार्यकारी अध्यक्ष पुष्पकमल दाहाल प्रचण्डलाई खुमलटार पुगेर भेटे लगतै अपरान्ह राष्ट्रपति विद्यादेवी भण्डारीलाई भेट्न गर्न पुगे । खुमलटारमा आज भएको छलफलमा पार्टीका वरिष्ठ नेता माधवकुमार नेपाल, उपाध्यक्ष बामदेव गौतमसमेत सामेल भएका थिए ।
प्रधानमन्त्री ओलीले खुमलटारबाट निस्के पछि गृहमन्त्री रामबहादुर थापा बादलसँग पनि भेट गरेका छन् । पार्टी भित्रको विवाद समाधान हुन नसके पछि पार्टी फुटको घोषणामा पुगेर बसेको छ । प्रधानमन्त्री ओली पार्टी बैठकमा सहभागी हुने र आफुले गरेका सर्वसम्मत निर्णयलाई पनि अस्वीकार गर्दै पार्टीलाई अनिर्णयको बन्दी बनाउँदै आएका ओलीको आज बिहानदेखिको सक्रियताले राजनीतिलाई पुनः तरङ्गित बनाएको छ । भ्रम र छलछाम गर्न माहिर मानिएका प्रधानमन्त्रीले पार्टीबाट विश्वास गुमाउँदै गएका छन् ।
प्रधानमन्त्री ओलीले संवैधानिक निकायसम्बन्धी अध्यादेश फिर्ता लिन सहमत भएता पनि आजसम्म उक्त अध्यादेश फिर्ता भएको छैन । सो अध्यादेशका विषयमा सर्वत्र विरोध भएको र पार्टी फुटको घोषणाको अवस्थामा पुगेको अवस्थामा राष्ट्रपति भण्डारीलाई भेटेर के निर्णय गर्ने हुन् भन्ने राजनीतिक वृत्तमा अन्योल छ । प्रधानमन्त्री ओलीको कार्यशैलीले देशको राजनीतिमा कतिखेर बज्रपात हुने भन्ने आशङ्का कायमै छ । सम्भवत प्रधानमन्त्रीले उक्त संवैधानिक निकायसम्बन्धी अध्यादेश फिर्ता लिने छन् ।
